КIэлэцIыкIухэм афэгушIуагъ

Урысые Федерацием и Федеральнэ ЗэIукIэ и Къэралыгъо Думэ Адыгэ РеспубликэмкIэ идепутатэу Хьасанэкъо Мурат Джэджэ районымкIэ станицэу Келермесскэм дэт кIэлэцIыкIу IыгъыпIэу «Аленка» зыфиIорэм щыIагъ.

Муниципальнэ образованиеу «Джэджэ районым» ипащэу Александр Бутусовыр, муниципальнэ образованиеу «Джэджэ районым» гъэсэныгъэмкIэ и ГъэIорышIапIэ ипащэу Ирина Панасенкэр, кIэлэцIыкIу IыгъыпIэу N 6-м ипащэу Ирина Серегинар зигъусэгъэ депутатым кIэлэцIыкIу IыгъыпIэр къыплъыхьагъ, амалэу иIэхэр зэригъэлъэгъугъэх. ХьакIэхэм апае сабыйхэм концерт цIыкIу къызат нэуж парламентарием кIэлэцIыкIухэм илъэсыкIэ шIухьафтынхэр аритыгъэх.

— Сабыйхэм лъэныкъо пстэумкIи хэхъоныгъэ ашIынымкIэ кIэлэцIыкIу IыгъыпIэм амал дэгъухэр иIэх. Ау станицэм кIэлэцIыкIухэр бэу къызэрэдэхъухьэхэрэм епхыгъэу анахь цIыкIухэм апае джыри унакIэ гъэпсыгъэн фае. Партиеу «Единэ Россием» ипащэхэми, Адыгэ Республикэм и ЛIышъхьэу КъумпIыл Мурати гъэсэныгъэм, кIэлэцIыкIу IыгъыпIэхэм якъызэIухын лъэшэу анаIэ зэратырагъэтырэм къыхэкIэу мэхьанэшхо зиIэ мы Iофыгъор зэшIохыгъэ зэрэхъущтым сицыхьэ телъ, — къыIуагъ Хьасанэкъо Мурат.

КЪАНДОР Анзор.

Урысые Федерацием и

Федеральнэ ЗэIукIэ и Къэралыгъо Думэ идепутат иIэпыIэгъу.