КIэлэеджакIохэм гущыIэгъу афэхъугъэх

БзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм икъулыкъушIэхэм кIэлэеджакIохэм апае психологическэ щынэгъончъэнымкIэ урок мы мафэхэм апэрэу зэхащагъ.

БзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум ипсихологическэ къулыкъу зызэхащагъэр илъэс 25-рэ зэрэхъурэм къыдыхэлъытагъэу Iофтхьабзэр рагъэкIокIыгъ.

ГъэIорышIапIэу Адыгэ Республикэм щыIэм ипсихологическэ къулыкъу ипащэу Екатерина Карповар Мыекъуапэ дэт лицееу N 19-м икIэлэеджакIохэм гущыIэгъу афэхъугъ. БзэджэшIагъэхэр ныбжьыкIэхэм зэрамыхьанхэм, джащ фэдэу ящыIэныгъэ щынэгъончъэным апае узэрэзекIощт шIыкIэхэр къафиIотагъэх, тестхэр кIэлэеджакIохэм аригъэкIугъэх.

Джащ фэдэу Интернетыр зыгъэфедэрэ кIэлэцIыкIухэм ыкIи Iэтахъохэм ящынэгъончъагъэ епхыгъэ гумэкIыгъохэри урокым къыщаIэтыгъэх, ахэм япсихикэ зэщымыкъоным фэшI анахь мэхьанэ зиIэ лъэныкъохэр къыхагъэщыгъэх.

ЗэрагъэунэфыгъэмкIэ, щынэгъончъэ зекIуакIэр зыфэдэр зышIэрэ ыкIи зезыхьэрэ цIыфыр ары ухъумагъэ хъурэр. ЗекIокIэ гъэнэфагъэхэр ышIэ къодыекIэ (унэм къимыгъахь, упчIэхэм джэуап ямытыжь, умышIэрэ цIыфым автомобилым удимытIысхь) ныбжьыкIэм ищынэгъончъагъэ къыухъумэшъущтэп, ышIэ мыхъущт закъохэр арэп ащ къыхиубытэнхэ фаер.

Щынагъо къызпыкIыщтыр ныбжьыкIэм зэхишIыкIын ыкIи ащ зыщиухъумэн амал иIэн фае.

БзэджэшIагъэ зезыхьагъэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу Адыгэ Республикэм щыIэм ипресс-къулыкъу.