Къэралыгъо IэпыIэгъур

Унэгъо былымэхъо фермэ зыгъэпсымэ зышIоигъохэм, езы­гъэжьэгъэкIэ фермерхэм, мэкъумэщ кооперативхэм язэхэщэн, язегъэушъомбгъун, ягъэкIэжьын апае къэралы­гъо IэпыIэгъур мэкъумэщ хъызмэтым хэхъоныгъэхэр егъэ­шIы­гъэнхэм фытегъэпсыхьэгъэ къэралыгъо программэм къыщыдэлъытагъ.

Адыгеир ащ илъэс къэс зэрэхэлажьэрэм ыкIи грантхэм яшIуагъэкIэ чIыгулэжьыным имызакъоу, былымхъунми, садлэжьынми зызэрэрагъэушъомбгъу­рэм игугъу мымакIэу тэшIы. Джащ фэдэу шъо-лъыр проектэу «Создание системы поддержки фермеров и развития сельской кооперации в РА» зыфиIорэм къыды­хэлъытагъэу «Агростартап» зы­фиIорэ къэралыгъо Iэпы­Iэгъур респуб­ликэм ща­ратыщт.

Мэкъумэщ хъызмэтшIапIэм изегъэушъомбгъун пае римыгъэгъэзэжьынэу сомэ миллиони 3-м нэсэу фермерым IэпыIэгъу етыгъэнэу ащ къыщыдэлъытагъ. А хъызмэтшIапIэр мэкъумэщ кооперативым хахьэмэ, сомэ миллиони 4-м нэсэу къыратыщт. Ахъщэу ищыкIагъэр зы­фэдизыр фермерым ыпэрапшIэу ыгъэунэфын, ащ ипроценти 10-м къыщымыкIэу ежь иунаеу IэкIэ­лъын фаеу ары шап­хъэу пылъыр.

Мы къэралыгъо IэпыIэгъухэм ащыщ зыгъотымэ зышIоигъохэм апае АР-м мэкъу-мэщымкIэ и Ми­нистерствэ зэнэкъокъу зэ­хищагъэу, хэлэжьэнхэу къырегъэблагъэх. Ащ тызэрэщигъэгъозагъэмкIэ, мэкъуогъум и 28-м нэс тхылъхэр аштэщтых. Мы лъэныкъомкIэ упчIэ зиIэр зэрэтеощт телефонхэри къагъэнэфагъэх: 8 (8772) 52-11-59-рэ, 52-19-35-рэ.

Джащ фэдэу «Центр компетенции в сфере сель­скохозяйственной ко­операции и поддержке фермеров» зыфиIорэм тхылъхэм ягъэхьазырынкIэ IэпыIэгъу къеты. Ащ иадрес: къалэу ­Мыекъуапэ, урамэу Гагариным ыцIэ зыхьырэр, 20 а, те­ле­фо­ныр: 8 (8772) 52-68-54-рэ.

АР-м мэкъу-мэщымкIэ иминистрэу Владимир Све­женец зэнэкъокъум хэлажьэмэ зышIоигъохэм тхылъхэм ягъэхьазырынкIэ адеIэнхэу зэкIэ ащ фэ­гъэзагъэхэм унашъо къафишIыгъ.

ХЪУТ Нэфсэт.