Къэпхьыщтмэ, уиешIакIэ къэгъот

«Динамо-МГТУ» Мыекъуапэ — «АлтайБаскет» Алтай край — 94:71.
ШэкIогъум и 18-м Адыгэ республикэ спорт Унэшхоу «Ошъутенэм» щызэдешIагъэх.

— ТиешIакIохэм хъурджанэм Iэгуаор бэрэ радзагъэми, текIоныгъэр IэшIэхэу къыдахыгъэу слъытэрэп, — къытиIуагъ «Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Андрей Синельниковым. — «АлтайБаскетым» иешIакIэ зэIукIэгъум къыщигъотын ымылъэ­кIыгъэу къэлъэгъуагъ. ЯтIонэрэ ешIэгъур нахь къин къытщыхъущт.

«Динамо-МГТУ-м» икапитанэу Артем Гапошиныр Магнитогорскэ, Тобольскэ ащешIагъэп, шъобжыр зэригъэхъужьыщтым пылъыгъ. Медицинэм иIофышIэхэм яшIуагъэкIэ ылъэ теуцожьыгъ, Алтай краим икомандэ дешIагъ.

ЗэIукIэгъум Хьакъунэ Руслъан IэпэIэсэныгъэ дэгъу къыщигъэ­лъэгъуагъ, очко 24-рэ къыхьыгъ, нэмыкI ешIакIохэри егугъугъэх.

Тыгъуасэ «Динамо-МГТУ-р» «АлтайБаскетым» ятIонэрэу ти­къалэ щыIукIагъ. Суперлигэм иятIонэрэ куп щыкIорэ зэнэ­къо­къур 2019-рэ илъэсым мэлылъфэгъу мазэм и 28-м аухыщт.