Къыхьыным пэблэгъагъ

«АГУ-Адыиф» Мыекъуапэ – «Университет» Ижевск – 27:27 (12:18).
Республикэ спорт Унэшхоу Кобл Якъубэ ыцIэ зыхьырэм щылэ мазэм и 14-м щызэIукIагъэх.
Зезыщагъэхэр: А. Семененко, Я. Стреленый.
«Адыиф», къэлэпчъэIутхэр: Баскакова, Силантьева; ешIакIохэр: Зубова – 3, Дворцевая – 8, Загайко – 3, Краснокутская – 1, Дьяченко – 5, Долина – 3, Васильева, Кириллова – 4, Дмитриева, Мартыненко, Пулейко.

ЕшIэгъу пэпчъ къыщыптекIохэ зыхъукIэ, текIоныгъэм уфэбэнэным зыфэбгъэсэныр Iоф къызэрыкIоп. «Адыифым» тыфэгумэкIышъ, гугъэр чIэтымынэу тылъэп­лъэ. «Университетыр» командэ лъэшхэм ащыщэп, ау ешIэкIэ хэхыгъэ къыгъотыгъэшъ, къышIопхьыныр IэшIэхэп. Ухъумэн Iофы­гъом пыдзагъэу псынкIэу, ошIэ-дэмышIэу ыпэкIэ елъы. Н. Ре­шетниковар ащ фэдэ ешIакIэм фэгъэсагъ, гъогогъуи 7 тикъэлапчъэ Iэгуаор къыдидзагъ. А. Портягинар гупчэм дэгъоу щешIэ, тазыр дзыгъохэр егъэцакIэх, ащ гъогогъуи 9 «Адыифым» икъэлапчъэ Iэгуаор къыдидзагъ. «Университетым» икъэлэпчъэIу­тэу О. Пойловар къахэтэгъэщы. ЦыхьэшIэгъоу ешIэ, Iэгуаор къы­зэкIидзэжьыным фэгъэсагъ.

«Адыифыр» иамалхэм ялъытыгъэу ешIагъ. Пчъагъэр зэрэлъыкIуатэщты­гъэр: 3:7, 7:13, 10:15, 12:18. «Университетыр» текIоныгъэм пэблэгъагъ, арэу щытми, «Адыифыр» хэкIыпIэхэм алъы­хъущтыгъ. А. Дворцеваям, К. Дьяченкэм, А. Загайко, Т. Кирилловам, В. Долинам къэлапчъэм Iэгуаор зэрэ­дадзэрэм дакIоу, зэхэщэн Iофхэр уащытхъунэу агъэцакIэщтыгъэх.

ЗэIукIэгъум икIэух зэрэхъугъэр: 17:20, 20:21, 22:22, 24:23, 24:26, 25:27. А. Загайко Iэгуаор А. Дворцеваям зыфедзым, ыужрэр банэзэ къэлап­чъэм дэуагъ – 26:27. Зы такъикъ къэнагъэу Т. Кирилловам хъа­гъэм Iэгуаор редзэ – 27:27. Командэхэм пчъагъэм хагъэхъонэу амалхэр яIагъэх. А. Краснокутскаяр нэгъэупIэпIэгъуи 3 къэнагъэу «Университетым» икъэлэ­пчъэ­Iут изакъоу екIугъ. Iэгуаор зедзым, О. Пойловам къызэкIидзэжьыгъ.

Командэхэм яешIэкIо анахь дэгъухэу О. Пойловамрэ А. Дворцеваямрэ республикэм физкультурэмкIэ ыкIи спортымкIэ и Ко­ми­тет ипащэ игуадзэ афэгушIуагъ, шIухьафтынхэр афишIыгъэх.