Къыблэ шъолъырымкIэ апэрэх

УФ-м ПенсиехэмкIэ ифонд и Правление хэтхэр, икъутамэхэм ыкIи подразделениехэм япащэхэр зыхэлэжьэгъэхэ семинар–зэхэсыгъо джырэблагъэ Москва щыкIуагъ.

2019-рэ илъэсым лъэныкъо анахь шъхьаIэу зыдэлэжьэщтхэм, уахътэу пыкIыгъэм шIагъэ хъугъэхэм ащ щатегущыIагъэх.

Мы Iофтхьабзэм ПенсиехэмкIэ фондым ичIыпIэ къулыкъу анахь дэгъур къызщыхахырэ зэнэкъокъум икIэухи щызэфахьысыжьыгъ. 2018-рэ илъэсымкIэ фондым и Къутамэу АР-м щыIэр Къыблэ Федеральнэ шъолъырым итхэм анахь дэгъоу къыхахыгъэу ар къэзыушыхьатырэ дипломыр ащ ипащэу Къулэ Аскэрбый къыраты­жьыгъ. Мыр къулыкъум ияблэ­нэрэ текIоныгъ. Къыблэ шъо­лъы­рымкIэ анахь дэгъоу къызэрэхахырэр яплIэнэрэ.

Зэнэкъокъур УФ-м ПенсиехэмкIэ ифонд 2005-рэ илъэсым къы­щыублагъэу зэхещэ. ЧIыпIэ органхэм цIыфхэм Iоф зэрада­шIэ­рэр, къэралыгъо фэIо-фа­шIэхэр зэрагъэцакIэхэрэм уахъ­тэу тырагъэкIуадэрэр, электроннэ шIыкIэхэр зэрагъэфедэхэрэр, къэ­ралыгъо программэхэм япхырыщын, нэмыкIхэри къыдалъытэхэзэ анахь дэгъур ащ къыщыхахы.