Къушъхьэм щылъэхъух

Къушъхьэм зыщагъэпсэфынэу хахьэхэрэм апэрапшIэу зарагъэтхынэу ыкIи зыдэкIощтхэ лъэныкъор зыфэдэр пэшIорыгъэшъэу къагъэнэфэнэу араIо зэпытыми, шъхьафитэу ащ щызекIорэр макIэп.

Аужырэ мафэхэм Краснодар краим къикIыгъэ зыгъэпсэфэкIо купым щыщ хъулъфыгъэ къушъхьэм щыкIодыгъ. Урысыем ошIэ-дэмышIэ IофхэмкIэ и Министерствэ икъутамэу Адыгеим щыIэм илъыхъокIо-къэгъэнэжьэкIо куп ипащэу Валерий Черепановым къызэриIорэмкIэ, ащ чъэпыогъум и 31-м къыщегъэжьагъэу лъэхъух. Ар «Богатырская поляна» зыфиIорэ къушъхьэтхым нэсыгъэхэу зигъусэ купым хэкIыгъ. ИIахьылэу игъусагъэхэм къызэраIорэмкIэ, ар палаткэм зекIым ыуж нэф къэшъыфэкIи къыгъэзэжьыгъэп.

Къушъхьэтхыр Мыекъопэ районым ит станицэу Севастопольскэм пэчыжьэп. Ащ ущызекIоныр псынкIагъоп ыкIи щынагъо. Аужырэ мафэхэм къушъхьэм осышхо къыщесы, ащ лъыхъон Iофхэр къегъэхьылъэх. ЧъыIэшхо щымыIэми, жьыбгъэр ины, чэщырэ къыгъэщтэу къыригъэжьагъ. Арэущтэу щытыми, лъыхъуакIохэм яIоф зэпагъэурэп. Гъощагъэр къагъотыжьынэу гугъапIи щыI. БэмышIэу Адыгеим ошIэ-дэмышIэ IофхэмкIэ икъулыкъу цIыф имысэу быбырэ аппаратхэр щы хъухэу къыратыгъэх. Ахэм яшIуагъэ инэу къэкIощт, тапэкIэ агъэфедэщтыгъэхэм ахэр атекIых. ЦIыфэу мэзым е къушъхьэм хэхьагъэр хэгъощыхьагъэмэ, ар беспилотникым къызилъэгъукIэ, макъэ къыгъэIущт.