Къурмэн мэфэкIым ипэгъокIэу

Мыгъэ быслъымэнэу дунаим тетхэм Къурмэн мэфэкIыр шышъхьэIум и 11-р ары зыхагъэунэфыкIырэр. Ащ ипэгъокIэу АР-м и ЛIышъхьэу КъумпIыл Мурат Адыгеим ыкIи Пшызэ шъолъыр ащыпсэурэ быслъымэнхэм ямуфтиеу Къэрдэн Аскэрбый ригъэблэгъагъ.

Пстэумэ апэ республикэм ипащэ Адыгеим икIыгъэу хьадж зышIынэу Чабэм кIуагъэхэм къа­кIэупчIагъ. Муфтиим къызэриIуагъэмкIэ, ахэм видеозэпхыныгъэ адыряIэу якъэбар мафэ къэс зыщагъэгъуазэ, анаIэ лъэ­шэу атет, зыпари гумэкIыгъо яIэп. Мыгъэ кIуа­гъэр нэбгырэ 62-рэ мэхъу, шышъхьэIум и 17-м къэкIожьынхэу ары.
Къурмэн мэфэкIым ихэгъэ­унэ­фыкIын къыщыдэлъытэгъэ шапхъэ­хэм ягъэцэкIэни республикэм ипащэрэ муфтиимрэ атегущыIа­гъэх. А мафэр тхьаумафэу зэрэтефэрэм къыхэкIыкIэ, къыкIэлъыкIорэ блыпэр, шышъхьэIум и 12-р, зыгъэпсэфыгъо мафэ шIыгъэным фэгъэ­хьыгъэ тхылъым АР-м и ЛIышъхьэ кIэтхагъ.

— ТичIыпIэгъоу Чабэм кIуа­гъэ­хэм гумэкIыгъо зэрямыIэр къэбар гушIуагъу, — къыIуагъ ащ. — Къурмэн мэфэкIыр зэрифэшъуашэм тетэу хэдгъэунэфыкIыныр, Чабэм кIуагъэхэм псаухэу, зыпари тхьамыкIагъо къащымышIы­гъэу къагъэзэжьыныр тэркIэ анахь шъхьаI.

ХЪУТ Нэфсэт.