КъумпIыл Мурат: «ЦIыфхэм яеплъыкIэхэмрэ ягумэкIхэмрэ ары «Единэ Россием» анахьэу ынаIэ зытыригъэтыщтыр»

Урысые политикэ партиеу «Единэ Россием» ия XIX-рэ зэфэсэу бэмышIэу Москва щыкIуагъэм партием ипа­щэу Дмитрий Медведевым тхьамэтагъор щызэрихьагъ. Урысыем и Президентэу Владимир Путиныр зыхэлэжьэ­гъэ пленарнэ зэхэсыгъоу щыIагъэр ащ изы хъугъэ-шIэгъэ шъхьэIагъ.

Урысые Федерацием ишъолъыр пстэуми ялIыкIо купхэмрэ хьакIэхэмрэ зэфэсым къекIолIэгъагъэх. Адыгеим ыцIэкIэ ащ хэлэжьагъ Урысые политикэ партиеу «Единэ Россием» и Адыгэ регион къута­мэ исекретарэу, партием и Генеральнэ совет хэтэу, республикэм и ЛIы­шъхьэу КъумпIыл Мурат.

Джащ фэдэу лIыкIо купым хэтыгъэх Адыгэ Республикэм ыцIэкIэ Къэ­ралыгъо Думэм идепутатэу Хьасанэкъо Мурат, партием и Тхьаматэу Дмитрий Медведевым ирегион общественнэ приемнэ ипащэу Шъэо Аскэр, республикэ гъэцэ­кIэкIо комитетым ипащэу АфэшIэгъо Рэмэзан, къа­лэу Мыекъуапэ ипэублэ къутамэу N 123-м исек­ретарэу, гурыт еджапIэу N 10-м идиректорэу Людмила Кузнецовар, муниципальнэ образованиеу «Тэхъутэмыкъое къоджэ псэупIэм» ипащэу Нэужьырэкъо Алый.

Пленарнэ зэхэсыгъоми, партием и Апшъэрэ Советрэ и Генеральнэ советрэ язэхэсыгъохэми партием пшъэрылъэу иIэ­хэр зэрагъэцакIэхэрэм, 2021-рэ илъэсым Къэралыгъо Думэм хэдзынэу щыкIощтхэм зызэрафа­гъэ­хьазырырэм щатегущы­Iагъэх. Партиеу «Единэ Россием» и Генеральнэ совет купихэу щызэхащэщтыр пшъэрылъ гъэнэфагъэхэм ягъэцэкIэн ыуж итыщт. Шъолъыр къутамэхэм яIофшIэн нахь гъэ­лъэшыгъэным анаIэ ты­рагъэтыщт. ЯIофшIэнкIэ мэхьанэ зиIэ лъэныкъохэм ар ахалъытагъ.

ГъэрекIо Адыгеим и ЛIышъхьэ партием и Генеральнэ совет зэрэха­гъэхьагъэр, Урысые по­литикэ партиеу «Единэ Рос­сием» и Адыгэ регион къутамэ исекретарэу шэкIогъум и 7-м зэрэха­дзыгъэр шъугу къэтэгъэ­кIыжьы. Партием ирес-пуб­ликэ къутамэ иконференцие «Единэ Россием» хэтхэм закъыщыфигъазэзэ, хэгъэгумрэ партиемрэ япащэхэм къагъэуцугъэ пшъэрылъхэм язэшIохын акIуачIэ зэдырахьылIэным мэхьанэшхо зэриIэр Къум­пIыл Мурат хигъэунэ­фыкIыгъ.

«Партием ишъолъыр къутамэ урипащэ зы­хъу­кIэ, регион, федеральнэ пшъэрылъхэр зэрагъэ­ца­кIэрэм ренэу гъунэ лъып­фын олъэкIы. Хэ­гъэ­гум и Президент къы­­зэрэхигъэщыгъэмкIэ, «шъо­лъырхэми, муни­ципалитетхэми «Единэ Россием» къащыдырамыгъаштэмэ гъэхъагъэ­хэр тшIын тлъэкIыщтэп». Джащ пае тIэ зэкIэдзагъэу Iоф зэдэтшIэн фае», — къыIуагъ КъумпIыл Мурат.