КъумпIыл Мурат Санкт-Петербург щыкIорэ дунэе экономическэ форумым хэлажьэ

Санкт-Петербург дэт къэгъэлъэгъопIэ гупчэу «Экспофорум» зыфиIорэм Петербург дунэе экономическэ форумыр (ПМЭФ) къыщызэIуахыгъ. Мэкъуогъум и 1-м къыщегъэжьагъэу и 3-м нэс ар кIощт, девизэу иIэр — «Экономикэм зызщиушъомбгъурэ лъэхъаным амалыкIэхэм алъыхъугъэныр».

Мы илъэсым, зэренэгуехэрэмкIэ, хэгъэгу зэфэшъхьафхэм ыкIи Урысые Федерацием ишъолъырхэм къарыкIынхэшъ нэбгырэ мин 12-м ехъу ащ хэлэжьэщт. Адыгеим икIыгъэ лIыкIо купым ипащ Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Мурат. Мызэгъогум правительствэм ыкIи республикэм ибизнес ялIыкIохэм япрограммэ апэрэу игъэкIотыгъэу щытыщт. ЗэзэгъыныгъиплIымэ Адыгеир форумым щакIэтхэнэу ары.

Ахэм ащыщых: Адыгэ Республикэмрэ АНО-у «ПроектыкIэхэр пхырыщыгъэнхэмкIэ стратегическэ инициативэхэм я Агентств» зыфиIорэмрэ азыфагу илъыщт зэдэлэжьэныгъэм, Адыгэ Республикэм и Кабинетрэ АНО-у «Социальнэ лъэныкъом инвестициеу пэIухьащтхэмкIэ агентствэр» зыфиIорэмрэ язэдэлэжьэныгъэ, Адыгэ Республикэм и Кабинетрэ ООО-у «Картонтарэмрэ» азыфагу илъ IофтхьабзэхэмкIэ зэзэгъыныгъэр, джащ фэдэу мэз хъызмэтымкIэ Федеральнэ агентствэмрэ Адыгэ Республикэм иминистрэхэм я Кабинетрэ мэзым епхыгъэ зэфыщытыкIэхэмкIэ язэдэлэжьэныгъэ ехьылIэгъэ зэзэгъыныгъэр.

Ащ нэмыкIэу КъумпIыл Мурат хэлэжьэщт экономическэ форумым «иделовой программэкIэ» заджэхэрэм.

Урысые Федерацием и Президентэу Владимир Путиныр зыхэлэжьэщт пленарнэ зэхэсыгъор ары форумым щыкIощт Iофтхьэбзэ шъхьаIэу хъущтыр. Мэкъуогъум и 2-м ар щыIэщт. Зэхэубытагъэу къэпIон хъумэ, форумым ипрограммэ Iофтхьэбзи 10-м ехъу къыхеубытэ, спикер 500 фэдиз ахэм ахэлэжьэщт. ПМЭФ-м ипрограммэ лъэныкъо зэфэшъхьафхэр къыхеубытэх: «Экономикэм ихэхъоныгъэ ипсынкIагъ», «Урысыем экономикэмкIэ иIофыгъохэр», «Хэхъоныгъэм илъэныкъо шъхьаIэу щытхэр цIыфхэр ары», «ЩыIэныгъэм зэхъокIыныгъэ фэзышIырэ технологиехэр», «Неущырэ мафэр зыфэдэщтыр». Мы форумым тегъэпсыхьагъэу Внешэкономбанкым дискуссиеу «Блокчейн — рождение новой экономики» зыфиIорэр зэхищэщт.

Петербург щыкIорэ дунэе экономическэ форумыр 1997-рэ илъэсым къыщегъэжьагъэу зэхащэ, 2006-рэ илъэсым къыщегъэжьагъэу Урысые Федерацием и Президент ащ пэщэныгъэ дызэрехьэ ыкIи ышъхьэкIэ хэлажьэ.

Адыгэ Республикэм и ЛIышъхьэ ипресс-къулыкъу.

Сурэтхэр А. Гусевым тырихыгъэх.