Къашъо пэпчъ узыIэпещэ

Дунаим щыцIэрыIо къэшъокIо ансамблэу Игорь Моисеевым ыцIэ зыхьырэм иконцерт апэрэу Мыекъуапэ щыкIуагъ. Бзылъфыгъэхэм ямэфэкI мафэ тефэу Адыгэ Республикэм и Къэралыгъо филармоние щызэхащэгъэ пчыхьэзэхахьэр бэрэ шIукIэ тыгу къэкIыжьыщт.

Лъэпкъ къашъохэу ансамблэм къышIыхэрэр фольклорым къыхихыгъэх, лъэхъаным диштэу шъуашэхэр ыгъэкIэрэкIагъэх. 1937-рэ илъэсым мэзаем и 10-м ансамблэр зэхащагъ. IэкIыб къэралыгъо 60-м нахьыбэмэ иконцертхэр къащитыгъэх. «Академический» зыфиIорэ цIэ лъапIэр апэу зыфаусыгъэ лъэпкъ къэшъокIо ансамблэр И. Моисеевым ыцIэ зыхьырэр ары.

Урыс, молдован, къалмыкъ къашъохэр ансамблэм Мыекъуапэ къыщигъэлъэгъуагъэх. Аргентин къашъоу «Гаучор» артистхэм къызэрагъэлъэгъуагъэм дунэе мэхьанэ етэты. КъэшъуакIохэм Iэгу афытеохэзэ, пчэгум заулэрэ къыращэжьыгъэх.

Ансамблэм дахэу къышIыхэрэ къашъохэм уяплъызэ, анахьэу унаIэ зытебдзэрэр пычыгъохэр зэрэзэфэшъхьафхэр, псынкIэу пчэгум щызекIонхэ зэралъэкIырэр ары. Бзылъфыгъэхэри, хъулъфыгъэхэри хъураеу зэхэтхэу зызэрагъэчэрэгъурэр зыплъэгъукIэ, IэпэIэсэныгъэу ахэлъым уасэу фэпшIыщтым уегупшысэжьын ищыкIагъэп.

Лъэпкъ къашъоу къашIырэм икупкI къызэIуахыным фэшI шъуашэу ащыгъыр едзыгъом «къыщагъэгущыIэ».

Адыгеим инароднэ артистхэу Къулэ Амэрбый, Пэрэныкъо Чатибэ, Хъоджэе Аслъан, Жэнэ Нэфсэт, сурэтышI-модельерэу СтIашъу Юрэ, нэмыкIхэу ансамблэм еплъыгъэхэм къашъохэр, шъуашэхэр агъэшIэгъуагъэх.

Адыгэ къашъоу «Лъэпэтетыр»

«Налмэсым» ихудожественнэ пащэу Хъоджэе Аслъан ыгъэуцугъэ адыгэ къашъоу «Лъэпэтетыр» И. Моисеевым ыцIэ зыхьырэ ансамблэм ирепертуар хэтэу концертхэм къащегъэлъагъо. Пшъашъэхэр зэкIужьэу фэпагъэх. Саехэр плъыжьых, пхъэм хэшIыкIыгъэхэ цуакъэхэм атетых, пхъэкIычым теохэзэ къашъом иедзыгъохэр къашIых. Искусствэм лъапсэр щызыгъэпытэрэ ансамблэм шIыкIэшIоу къыгъотыгъэм уегъэгушхо. Адыгэ лъэпкъыр дунаим нахьышIоу щашIэнымкIэ ащ фэдэ къашъохэр тищыкIагъэх. ЗэлъашIэрэ къашъоу «Яблочкэу» матросхэм къашIырэмкIэ концертыр аухыгъ. Артистхэм зэдырагъаштэ, псынкIэу загъазэ, лъапэкIэ уцущтхэми е фэшъхьаф шIыкIэ къагъэлъэгъощтми, искусствэ лъагэм иIотакIохэу зэрэщытхэр къаушыхьаты.

Адыгэ Республикэм культурэмкIэ иминистрэу Аулъэ Юрэ ти ЛIышъхьэу КъумпIыл Муратэ, Правительствэм ацIэкIэ ансамблэм «тхьашъуегъэпсэу» риIожьыгъ.

И. Моисеевым ыцIэ зыхьырэ ансамблэм ихудожественнэ пащэу, Урысыем, Адыгеим янароднэ артисткэу Елена Щербаковар зэхахьэм гуфэбэныгъэ хэлъэу къыщыгущыIагъ. ТIысыпIэ нэкI зимыIэжь залым искусствэр зыгу рихьыхэу чIэсыгъэхэр къэтэджыхи, хьакIэхэм зэпамыгъэоу бэрэ Iэгу афытеуагъэх.

Ансамблэ цIэрыIомрэ Адыгэ Республикэмрэ зэфыщытыкIэу зэдыряIэр щыIэныгъэм зэрэщыпытэщтым щэч хэлъэп. Шъопсэу, артистхэу Москва къикIыгъэхэр! ШъуикъашъохэмкIэ тыжъугъэгушIуагъ, адыгэ лъэпкъ искусствэри лъагэу шъуIэтыгъэ.

ЕМТIЫЛЪ Нурбый.