Китаим илIыкIо куп Мыекъуапэ къэкIощт

Мы къэралыгъом ит къалэу Цюаньчжоу илIыкIо куп мы тхьамафэм Мыекъуапэ къэкIощт. Ащ хэтыщтых муници­паль­нэ лъэпкъ конгрессым ыкIи правительствэм, бизнес-сообществэм ялIыкIохэр.Iэнэ хъурэе шIыкIэм тетэу кIощт Iофтхьабзэм экономикэмкIэ, сатыумкIэ, гъэсэныгъэмкIэ ыкIи наукэмкIэ, культурэмкIэ лъэныкъохэр зэрэзэдэлэжьэнхэ алъэкIыщтхэр щагъэнэфэщтых. ЗэIукIэгъум пшъэрылъ шъхьаIэу иIэщтыр Мыекъуапэрэ Цюаньчжоурэ ныбджэгъуныгъэ зэ­фыщытыкIэ азыфагу илъыным фэгъэхьыгъэ зэзэгъыныгъэм зэдыкIэтхэнхэр ары.

Джащ фэдэу Мыекъуапэ ипредприятие пэрытхэр къа­кIухьанхэу, ахэм яIофшIэн зэ­рэзэхащэрэм зыщагъэгъозэнэу агъэнафэ. Республикэм икъэлэ шъхьаIэ иадминистрацие къызэрэщыхагъэщыгъэмкIэ, Мыекъуапэрэ Цюаньчжоурэ язэпхыныгъэ гъэпытэгъэнымкIэ амалышIухэр щыIэх. Ащ къыпкъырыкIыхэзэ къэлитIум азыфагу ныбджэгъуныгъэ илъы­ным фэгъэхьыгъэ зэзэгъы­ны­гъэм зэдыкIэтхэнхэу лъэныкъо­хэм унашъо ашIыгъ.

— Адыгеим икъэлэ шъхьаIэрэ Китаим имегаполисрэ зэгуры­Iоныгъэ ыкIи ныбджэгъуныгъэ азыфагу илъ. IофшIэным, бизнесым алъэныкъокIэ опытэу аIэкIэлъымкIэ къэлитIум ялIыкIохэр пчъагъэрэ зэхъожьыгъэх. ТапэкIэ зэрэзэдэлэжьэнхэ алъэкIыщтхэм ягъэнэфэнкIэ Iофышхо ашIагъ, джы ар щыIэныгъэм щыпхыращын гухэлъ щыI, — къеты мэрием ипресс-­къулыкъу.