Кадастрэ учетымрэ фитыныгъэу яIэхэм ятхынрэ афэгъэхьыгъэ хэбзэгъэуцугъэм фэхъугъэ зэхъокIыныгъэхэр

ЦIыфхэм анаIэ зытырадзэгъэ зэхъо­кIыныгъэ инхэр хэбзэгъэуцугъэу щыIэм фэхъугъэх. ГущыIэм пае, амыгъэкощырэ мылъкумкIэ къэралыгъо реестрэ зыкIым изэхэгъэуцон. Ащ къыхеубытэх къэралыгъо регистрациемрэ кадастрэ учетымрэ. Амыгъэкощырэ мылъкумкIэ къэралыгъо кадастрэм итхэмрэ фитыныгъэхэмкIэ къэралыгъо реестрэ зыкIым итхагъэмрэ зэхэтхэу Къэралыгъо реестрэ зыкIым (ЕГРН-м) хэхьагъэх. Ащ амал къытыгъ къэралыгъо фэIо-фашIэхэр электроннэ шIыкIэм тетэу гъэпсыгъэнхэу. А пстэури зыкIа­шIэрэр цIыфхэу закъыфэзыгъазэхэрэм яуахътэ пкIэнчъэу ашIуамыгъэкIоным пай.

Псэуалъэхэм якадастрэ учетрэ фитыныгъэхэм ятхынрэ а зы уахътэм зэдагъэцэкIэнхэ е шъхьаф-шъхьафэу зэшIуахынхэ алъэкIыщт. Зы лъэIу тхылъ къулыкъу гъэнэфагъэу зытхыхэрэм IэкIахьэмэ, лъэныкъуитIури къафигъэ­цэкIэщт. Росреестрэм ифэIо-фашIэхэм ащыщэу зым ехъу къыкIэмылъэIухэмэ, уахътэу ащ ыкъудыищтыр IофшIэгъу мэфи 7, кадастрэ учетым хэуцон хъумэ — мэфи 5.

Амыгъэкощырэ мылъкур зыдэщыIэм ежь ышъхьэкIэ лъэIу тхылъыр къэзытырэр щыIэныр ищыкIагъэп. Тыдрэ чIыпIэ щыIэми, игухэлъ къыфагъэцэ­кIэщт. ГущыIэм пае, чIыгу Iахьыр къалэу Краснодар щыIэу, ар зиунаер къалэу Мыекъуапэ щэпсэумэ, документхэр аритынхэм пае Краснодар кIоныр ищыкIагъэп. Адыгэ Республикэм и Кадастровэ палатэ иофисэу документхэр аIызыхырэм ыкIи къязы­тырэм зыфигъазэмэ икъущт. Ар зыдэ­щыIэр: къ. Мыекъуапэ, ур. Жуков­скэр, 54-р ыкIи Мыекъопэ районыр, п. Тульскэр, ур. Школьнэр, 24-р.

Джащ фэдэу документхэр Интер­не­тым­кIи аIэкIэжъугъэхьанхэ шъулъэ­кIыщт Росреестрэм ипортал (www.-rosreestr.ru) къызыфэжъугъэфедэзэ.

ЕГРН-м къыхатхыкIыхэрэр шIыкIэ зэфэшъхьафхэмкIэ аIэкIагъахьэх: амы­гъэкощырэ мылъкумкIэ атхыгъэ фитыныгъэхэр; мылъкум кадастрэ уасэу иIэр; чIыпIэм икадастровэ план; мылъкум фэгъэхьыгъэ къэбарыр зыIэкIэхьагъэм фэгъэхьыгъэ справкэр; фитыныгъэ зиIэм иакъылкIэ щыкIагъэ зэриIэр къэзыушыхьатырэ тхылъыр ыкIи нэмыкIхэр.

IофшIэгъу мэфищым къыкIоцI ЕГРН-м ит къэбарыр хэтрэ цIыфи IэкIагъэхьан алъэкIыщт. Ащ къыхэхыгъэ къэбарэу фи­тыныгъэу иIэр къэзыушыхьатырэр хэбзэгъэуцугъэу щыIэм тегъэпсыхьагъэу зыIэкIагъахьэрэр амыгъэкощырэ мылъкур зыер е ащ цыхьэ зыфишIырэр ары. Арэущтэу зыкIашIырэр мылъкур зиунаем ифитыныгъэхэр укъуагъэ мы­хъунхэм, ахэр къэухъумэгъэнхэм пай.

ЫпкIэ хэлъэу къэбарыр аIэкIагъахьэ: тхылъыпIэ документым тефэрэр сомэ 300 (физическэ лицэхэм), сомэ 950-м къыщыублагъэу (юридическэ лицэхэм). Электроннэ шIыкIэм тетэу къэбарыр гъэпсыгъэмэ, соми 150-м къыщыубла­гъэу (физическэ лицэхэм), сомэ 400-м нэсэу (юридическэ лицэхэм). Ау ЕГРН-м къыхэтхыкIыгъэу кадастрэ уасэм фэгъэ­хьыгъэр ыпкIэ хэмылъэу зышIоигъо пстэуми аIэкIегъахьэ.

Къэбарыр къызIэкIэзыгъахьэ зышIо­игъохэм Адыгэ Республикэм икадастровэ палатэ иофисхэм, джащ фэдэу пшъэрылъыбэ зэшIозыхырэ Гупчэм иофисхэм зафагъэзэн алъэкIыщт. Поч­тэмкIи ялъэIу агъэхьын алъэкIыщт (къ. Мыекъуапэ, Юннатхэм яурам, 9 Д). Ащ нэмыкIэу Росреестрэм ипорталкIэ электроннэ шIыкIэм тетэу къэралыгъо фэIо-фашIэр къызфагъэфедэн алъэкIыщт.

Ю. Тетерина.

«ФКП Росреестра» зыфиIорэм икъу­тамэу Адыгэ Республикэм щыIэм IофшIэным иуплъэкIункIэ иотдел иинженер.