«Кабардинкэм» тыIукIэщт

Къэбэртэе-Бэлъкъарым и Къэралыгъо ансамблэ цIэрыIоу «Кабардинкэм» ипчыхьэзэхахьэ Адыгэ Республикэм и Къэралыгъо филармоние непэ щыкIощт.

КъэшъокIо ансамблэу «Кабардинкэр» илъэс 85-рэ зэрэхъугъэм фэгъэхьыгъэ концертхэр Къыблэ шъолъырым, Темыр Кавказым ащызэхащэх. Юбилей зэхахьэу Налщык щырекIокIыгъэм Адыгэ Респуб­ликэм инароднэ артистхэу, «Кабардинкэм» иныбджэгъухэу Къулэ Мыхьа­мэтрэ НэмытIэкъо Аслъанрэ хэлэжьагъэх.

— Адыгэ Республикэм культурэмкIэ и Министерствэ ыцIэкIэ «Кабардинкэм» тыфэгу­шIуагъ, дунэе искусствэм нахь щылъыкIотэнэу тыфэлъэIуагъ, — къыта­Iуагъ Къулэ Мыхьамэтрэ НэмытIэкъо Аслъанрэ. — Ансамблэр хэгъэгубэмэ ащыIагъ, республикэм ыцIэ лъагэу еIэты.

Тиреспубликэ итын анахь лъапIэу медалэу «Адыгеим и Щытхъузехьэр» зыфагъэшъошэгъэ ансамблэу «Кабардинкэм» ихудожественнэ пащэу, Адыгэ Республикэм изаслуженнэ артистэу Iэтэбый Игорь къызэриIуагъэу, Мыекъуа­пэ концертэу къыщатыщтым лъэпкъ къашъохэр къыщашIыщтых, адыгэ шъуа­шэм идэхагъэ къыщагъэлъэгъощт.

Пчыхьэм сыхьатыр 6-м концертыр филармонием щаублэщт. Искусствэр зышIогъэшIэгъонхэр зэхэщакIохэм рагъэблагъэх.