ИIофшIэн шIогъэшIэгъон

Гъэзетым къэбарэу къихьэрэр гъэшIэгъонэу, еджэрэр зыIэпищэу тхыгъэным редакцием чIэсхэм зэкIэми Iоф дашIэ. Журналистым къыгъэхьазырыгъэ тхыгъэр гъэзет нэкIубгъом зэрегъэкIугъэщтми бэ елъытыгъэр. Пстэуми апэу гъэзетеджэм ащ ынаIэ тыредзэ, нэужым тхыгъэм еджэн гухэлъ ешIы.

Республикэ гъэзетэу «Советскэ Адыгеим» пшъэдэкIыжьыр зыхьырэ исекретарэу Александра Минаковам урысые печатым и Мафэ ехъулIэу гущыIэгъу тыфэхъугъ, иIофшIэн зэрэзэхищэрэм, еплъыкIэу щыIэныгъэм щыриIэхэм защыдгъэгъозагъ.

ТигущыIэгъу Адыгэ къэралыгъо университетым филологиемкIэ ифакультет 2017-рэ илъэсым къыухыгъ ыкIи аспирантурэм ишIэныгъэхэм ащыхигъэхъонэу чIэхьагъ.

— Гъэзетым Iоф щысшIэнэу сегупшысэу къыхэкIыгъэп. СицIыкIугъом къыщегъэжьагъэу кIэлэегъаджэ сыхъуным сыкIэ­хъопсыщтыгъэ. Седжэныр лъэшэу сыгу рихьыщтыгъэ, ащ къы­хэкIэу урысыбзэмрэ литературэмрэкIэ кIэлэегъаджэу сэнэхьат зэзгъэгъотынэу гухэлъ сшIыгъагъэ. Университетыр къы­зысэухым аспирантурэм сычIэхьагъ. Ащ иятIонэрэ курс сыщеджэзэ гъэзетым сыкъы­Iухьанэу хъугъэ. 2008-рэ илъэсым къыщегъэжьагъэу Iоф зы­щы­сшIэрэ чIыпIэр зэблэсхъугъэп.

Александрэ гъэзетым Iоф щишIэнэу зэрэхъугъэр ыгу къэ­кIыжьы. Ипшъэшъэгъу «Советскэ Адыгеим» щылажьэщтыгъ, мыщ IофшIэпIэ чIыпIэ щыIэ зэхъум ежьыри къыIухьанэу къеджагъ. ТIэкIу щылажьэмэ нэмыкI чIыпIэ кIон гухэлъ иIэу тигущыIэгъу гъэзетым къэкIо­гъагъ. Ау апэрэ мафэу редакцием ипчъэхэр къызызэIуихыгъэм къыщегъэжьагъэу фэчэфэу къэкIо ыкIи нэмыкI сэнэхьат къыхихыным егупшысэжьырэп.

Александрэ иIофшIэн къины, ау гъэшIэгъоны. Журналистхэм, редакторхэм, корректорхэм, нэмыкIхэми Iоф адешIэ, гъэзетым игъэхьазырын пылъ. Зэрэ­хъурэмкIэ, иIофшIэгъухэм пшъэ­рылъэу яIэм лъыIэсын, ахэм зэгурыIоныгъэ адыриIэу Iоф адишIэн фае.

— Журналистыр зы лъэныкъо гъэнэфагъэ фэгъэзагъэмэ, пшъэ­дэкIыжь зыхьырэ секретарыр темэ пстэуми дэгъоу ащыгъозэн фае, — иIофшIэн нахь игъэкIотыгъэу тыщегъэгъуазэ Александрэ. — Гъэзетым нахь гъэшIэгъонэу идгъэхьащт статьяр, ар зытетыщт нэкIубгъор, сурэтэу хэтыщтыр зыфэдизыр тэгъэ­нафэх. Текстэу журналистхэм къатхыгъэр тIэкIу дгъэтэрэзы­жьэуи мэхъу. Пстэуми апэу коллективыр зыпылъыр тиIоф­шIагъэ гъэзетеджэм шIогъэшIэгъонэу тшIыныр ары.
Гъэзетыр статья зэмылIэужыгъохэмкIэ баеу, къэбарыкIэхэр итэу къыдэбгъэкIыныр IэшIэхэп. ТигущыIэгъу къызэриIорэмкIэ, чэщ кIахэм нэс IофшIапIэм чIэсхэуи къыхэкIы. Ау ащ пае къин алъэгъугъэу къащыхъурэп. Ежьхэр зэрэфаем фэдэу ашIыгъэ гъэзетым гухахъо хагъуатэ.

— Республикэм щыхъурэ- щышIэрэр псынкIэу ыкIи гъэзет­еджэмкIэ еджэгъошIоу къызэрэттхыщтым тыпылъ, — къе­Iуа­тэ тигущыIэгъу. — КъытIэ­кIэхьэгъэ къэбарым ишъыпкъагъэ зэхэтфыным, ар зэгъэфагъэу гъэзет нэкIубгъом къид­гъэхьаным тыпылъ. Джащ фэдэу рубрикэ зэфэшъхьафхэри тиIэх. Хэти ежь шIогъэшIэгъон статья ригъотэным, джыри зэ гъэзетыр къыштэн гухэлъым къыфэущыным тишъыпкъэу Iоф дэтэшIэ.

Александрэ къызэриIорэмкIэ, гъэзетыр гъэшIэгъон зэрэхъущтым егупшысэ зэпыт, ишIэныгъэхэм зэрахигъэхъощтым сыдигъуи пылъ. ШIогъэшIэгъон горэ федеральнэ гъэзетхэм зарилъа­гъокIэ, ар ежь иIофшIапIэ зэрэщигъэфедэщтым егупшысэ.

— Илъэс зэкIэлъыкIохэм зы чIыпIэ Iоф щыпшIагъэ зыхъукIэ, уиIофшIэгъухэри къыппэблагъэхэ мэхъу, — еIо тигущыIэгъу. —НэмыкI чIыпIэ сыкIонэу сырагъэблагъэми, ащ бэрэ сызэрегупшысэщтыр нафэ, сымыкIощтэуи къысщэхъу. СиIофшIэгъу­хэр сиунагъо щыщхэм фэдэ хъугъэх. ЧIыпIэ къин ифагъэм IэпыIэгъу тыфэхъу, гушIуагъо зиIэм дэтэгощы. ПIэ зэкIэдзагъэу узэдеIэжьы зыхъукIэ, къи­ни, хъяри IэтыгъошIу мэхъу.

Александрэ къызэриIорэмкIэ, гъэзетыр зы чIыпIэ имытэу, ыпэкIэ лъыкIотэным дэлэжьэ зэпытых. Ащ итеплъэ зэблэхъу­гъэным, кIэ горэ хэлъхьэгъэным, къихьэрэ тхыгъэхэр нахь гъэшIэгъон хъунхэм зиIахьышIу хэлъыр редактор шъхьаIэу Цундышк Зар ары. Ащ пшъэдэ­кIыжьышхоу иIэр къыгурыIозэ иIофшIэн къекIуалIэ ыкIи иIоф­шIэгъухэм зэрифэшъуашэу япшъэрылъхэр зэрагъэцэкIэщтым пылъ. Мыщ фэдэ шIыкIэм зэфэхьысыжьышIухэр къызэрэ­кIэлъыкIохэрэр гъэзетым хэ­хъоны­гъэ зэришIырэм къеушы­хьаты.

Гъонэжьыкъо Сэтэнай.