ИшIушIагъэ агъэлъапIэ

СпортымкIэ мастерэу Мырзэ Джанхъот фэгъэхьыгъэу самбэмкIэ шIэжь зэнэкъокъу Тэхъутэмыкъое районым икъуаджэу Бжыхьэкъоежъым щыкIуагъ. 1999 — 2001-рэ илъэсхэм къэхъугъэ кIалэхэр алырэгъум щызэбэныгъэх.

Краснодар краим, Адыгэ Республикэм яспорт еджапIэхэм защызыгъэсэрэ ныбжьыкIэхэр зэIукIагъэх. Яонтэгъугъэхэм ялъытыгъэу куп зэфэшъхьафхэм ахэтхэу бэнэкIо 220-рэ зэнэкъокъугъ.

Мырзэ Джанхъот Щынджые къыщыхъугъ, лэжьэкIо унэгъо Iужъум щапIугъ. Икъуаджэ спорт бэнапIэ зэрэдэмытым къыхэкIэу гъунэгъу чылэу Тэхъутэмыкъуае кIозэ самбэм, дзюдом зафигъасэщтыгъ. Километри 7 хъурэ гъогур шIочыжьагъэп. Ыгу Iэтыгъэу спорт еджапIэм нэсыщтыгъ. Тренер IэпэIасэу Джармэкъо Нурбый ипащэу дзюдом, самбэм яшъэфхэр ыIэ къыригъахьэщтыгъэх.

— Мырзэ Джанхъот зэрэныбжьыкIэу сынэгу кIэт, — къеIуатэ Урысыем, Адыгеим язаслуженнэ тренерэу, Дж. Мырзэм иапэрэ тренерэу Джармэкъо Нурбый. — Ныбджэгъубэ иIагъ, гукIэгъу хэлъыгъ. ЦIыфышIоу зэрэщытыр щыIэныгъэм къыщылъагъощтыгъ. Джанхъот ныбжьыкIэхэм щысэ тырахы.

Хы ШIуцIэм Iут псэупIэу Жьыубгъу Iоф щишIэзэ, Дж. Мырзэр еджапIэу зызыщигъэсагъэм мылъкукIэ IэпыIэгъу фэхъущтыгъ. ГухэлъышIухэр зиIэгъэ нарт шъаор пчыхьэм иунэ къекIужьызэ, ошIэ-дэмышIэу щэгынхэр хъункIакIом къытырипхъэнкIагъэх. Щынэр зыфэдэр зымышIэщтыгъэ батырым лъыр кIэчъызэ чIым зыфищэигъ…

Ныбджэгъухэр, Iахьылхэр, спортымкIэ пащэхэр кIэщакIо фэхъухэзэ, Мырзэ Джанхъот фэгъэхьыгъэ зэнэкъокъухэр илъэс къэс Тэхъутэмыкъое районым щызэхащэх. ИшIушIагъэхэмкIэ непи къахэтэу алъытэзэ, игугъу дахэкIэ ашIы.

Купхэм апэрэ чIыпIэр къащыдэзыхыгъэхэм шъуащытэгъэгъуазэ.

Николай Матвиенко, кг 32-рэ, Кобл Рэмэзан, кг 35-рэ, Александр Чернов, кг 38-рэ, Батмэн Амир, кг 42-рэ, Тыгъужъ ТIахьир, кг 48-рэ, Хьакъуй Анзор, кг 52-рэ, ЖакIэмыкъо Темыркъан, кг 55-рэ, НакI Айдэмыр, кг 56-рэ, Литвиненко Кирилл, кг 60, Степан Иванов, кг 65-рэ, Николай Кесов, кг 70-рэ, Максим Дороненко, кг 70-м къехъу, Еутых Рэмэзан, кг 75-рэ, Делэкъо Ислъам, кг 80, ЛIыIужъу Азмэт, кг 90-рэ.

ХагъэунэфыкIырэ чIыпIэхэр къыдэзыхыгъэхэм шытхъу тхылъхэр, шIухьафтынхэр аратыжьыгъэх.

Сурэтым итыр: Мырзэ Джанхъот.

ЕМТIЫЛЪ Нурбый