Италиемрэ Адыгэ Республикэмрэ язэдэлэжьэныгъэ зырагъэушъомбгъущт

Адыгэ Республикэм и ЛIышъхьэ ипшъэрылъхэр зыгъэцэкIэрэ КъумпIыл Мурат Итальянскэ Республикэм и ГъэшIогъэ консулэу Къыблэ Федеральнэ шъолъырым ыкIи Темыр-Кавказ Федеральнэ шъолъырым щыIэ Пьерпаоло Лодиджиани тыгъуасэ ригъэблэгъагъ.

ЗэIукIэгъум хэлэжьагъэх Адыгэ Республикэм и Премьер-министрэ ипшъэрылъхэр зыгъэ­цэкIэрэ Наталья Широковар, Адыгэ Республикэм и Премьер-министрэ игуадзэ ипшъэрылъхэр зыгъэцэкIэрэ Сапый Вячеслав, Адыгэ Республикэм экономикэ хэхъоныгъэмкIэ ыкIи сатыумкIэ иминистрэ иапэрэ гуадзэу Во­рэкъо Хьалимэт.

ЗэдэгущыIэгъум илъэхъан Италиемрэ Адыгемрэ сатыу-экономикэ ыкIи блэгъэныгъэ зэфыщытыкIэхэу азыфагу илъхэр гъэпытэгъэнхэм епхыгъэ Iофыгъохэм атегущыIагъэх.

«Зэдэлэжьэныгъэм ылъэны­къокIэ опытышIу тиI, анахьэу етIани провинциеу Къыблэ ТиролькIэ. Ом изытеткIи тирес­публикэ ар ехьыщыр. 2012-рэ илъэсым къыщегъэжьагъэу республикэм ипредприятие заулэмэ чъыгхатэхэм ядэлэжьэнкIэ Италием гъэхъагъэ хэлъэу Iоф дашIэ. А зэдэлэжьэныгъэм джы­ри нахь зедгъэушъомбгъун мурад тиI. ЛъэныкъуитIуми федэ къытфэзыхьыщт проектыкIэхэм татегущыIэным тыфэхьазыр», — къыIуагъ КъумпIыл Мурат.

Италием итехнологиехэр зы­щагъэфедэгъэ проектхэр Адыгеим щагъэцакIэх. ГущыIэм пае, Италием къыращыгъэхэр агъэ­федэхэзэ охътэ кIэкIым къы­кIоцI псынкIэу хэхъоныгъэ зы­шIыщт чъыгхэр ыкIи цумпэ лъэпкъ зэфэшъхьафхэр гектар 680-рэ фэдизым къащагъэкIы.

Теуцожь районымкIэ гектар 40-м фэдизым бжьыныфыр, хэ­тэрыкI лъэпкъ зэфэшъхьафхэр къыщагъэкIых. Мы илъэ­сым зы гектарым малинэ, гектари 10-м — голубикэ къаща­гъэкIын мурад яI. Ащ дакIоу пхъэшъхьэ-мышъхьэхэмрэ хэтэ­рыкIхэмрэ гъэу­чъыIыгъэнхэмкIэ, переработкэ шIыгъэнхэмкIэ системэ гъэнэфагъэхэм апае ивестициехэр къызэрэзыфагъэфедэщтхэм яп­хыгъэ Iофыгъохэм ахэплъэх. Къуаем икъыдыкIэ­кIынкIэ предприятие цIыкIухэр гъэпсыгъэн­хэм игупшыси зыда­Iыгъ. АщкIэ проектхэри щыIэх.

Пьерпаоло Лодиджиани къыхигъэщыгъ Адыгеим санаторнэ-курорт бизнесыр дэгъоу зэрэщызэхэщагъэр, джащ фэдэу къыIуагъ зэдэлэжьэны­гъэм зырагъэушъомбгъун, лъэныкъо зэфэшъхьафхэмкIэ инвестициехэр нахьыбэу къызIэкIа­гъэ­хьан­хэ мурад зэряIэр.

Бизнес-планхэм нахь игъэ­кIотыгъэу атегущыIэнхэм пае лъэныкъуитIури зэзэгъыгъэх Италием ипредпринимательхэр республикэм къэкIонхэу. Ащ нэмыкIэу Италием иконсул къы­кIуагъ Шъачэ щыкIощт Урысые инвестиционнэ форумым иIофшIэн тегъэпсыхьагъэу Адыгеим и ЛIышъхьэ ипшъэрылъхэр пIэлъэ гъэнэфагъэкIэ зыгъэ­цакIэрэмрэ Италием илIыкIоу Урысыем щыIэмрэ зэIуигъэ­кIэнхэм зэрэфэхьазырыр.

АР-м и ЛIышъхьэ ипресс-къулыкъу.

Сурэтхэр А. Гусевым тырихыгъэх.