Инэу тафэраз

ТIопсэ районым ыкIи къалэу Шъачэ адэтхэ еджапIэхэм кIэлэцIыкIухэр зэреджэщтхэ тхылъхэр зэрямыIэхэм къыхэкIэу адыгабзэр зэрагъэшIэнымкIэ къин ащалъэгъу.

Мы Iофыгъом илъэсыкIэ еджэгъур къимыхьэзэ Краснодар IофшIэгъу купэу щызэхащэгъагъэр пэшIорыгъэшъэу щыхэплъэгъагъ. Зэреджэщтхэ тхылъхэм анэмыкIэу художественнэ ыкIи методическэ литературэр зэрафимыкъурэр ащ къыщыхагъэщыгъагъ.

Адыгэ Республикэм и ЛIышъхьэу КъумпIыл Мурат IэпыIэгъу мы Iофыгъом­кIэ къафэхъунэу зэриIогъагъэр къыгъэшъыпкъэжьыгъ. А 1 — 9-рэ классхэм арысхэ кIэлэеджакIохэм адыгабзэр рызэрагъэшIэнэу ТIопсэ районым ит къуаджэу Агуяпэ тхылъхэр къаригъэ­щагъэх. Къащэгъэ литературэмкIэ Агуяпэ, Псыбэ, Гъуакъо (Георгиевскэм), ТIуапсэ яеджапIэхэм адэгощэщтых.

Тхылъхэр къафэзыщагъэхэр Адыгэ Республикэм илIыкIоу Краснодар краим иадминистрацие дэжь щыIэ Хьатэгъу Налбыйрэ Краснодар краим иадминистрацие IэкIоцI политикэмкIэ идепартамент идиректор ипащэу Петр Халаненкэмрэ арых.