Илъэсым ыкIэм ехъулIэу

Лъэпкъ проектэу «Демография» зыфиIорэм къыдыхэлъытагъэу Мыекъопэ къэлэ клиническэ сымэджэщым псэолъэшI IофшIэнышхохэр мы уахътэм щэкIох.

Перинатальнэ гупчэм игъэ­кIотыгъэ гъэцэкIэжьынхэр ра­шIылIэх, я 5-рэ къат тырашIыхьэ. Джащ фэдэу сымэджэщым къатищ хъурэ IэзэпIэ-­диагностическэ корпус щашIы.

IофшIэнхэр зэрэкIохэрэм къытегущыIагъ мыщ иврач шъхьа­Iэу Владимир Лобода.

— Мы илъэсым сымэджэщым игъэкIотыгъэ IофшIэнхэр щызэхэтэщэх, — къытфеIуатэ врач шъхьаIэм. — Перинатальнэ гупчэм гъэцэкIэжьынхэр щэкIох, я 5-рэ къатри тетшIыхьащт. IофшIэнхэм яшIуагъэкIэ псэуалъэм изытет нахьышIум ылъэныкъокIэ зихъожьыщт. Сабый къэхъугъакIэхэр къызщы­чIащыжьыщт унэр, приемнэ отделениер, пстэури аужырэ шапхъэхэм адиштэу зэтегъэпсы­хьэгъэщтых.

Владимир Лобода къызэри­IуагъэмкIэ, я 5-рэ къатым реа­нимационнэ отделениехэр те­ты­­щтых. Джащ фэдэу игъо къэ­мысызэ къэхъу­гъэ сабыйхэр ащ чIэлъыщтых. ПстэумкIи федеральнэ ыкIи республикэ бюджетхэм къахэхыгъэ сомэ миллиони 189-рэ мыщ пэIуагъэхьанэу агъэнафэ. Ащ хэхьэ оборудованиякIэу чIагъэ­уцощтри.

— Мы уахътэм палатэхэм нэбгыри 4 — 5 арылъынэу щы­тымэ, гъэцэкIэжьынхэм ауж ахэр нэбгыри 2 — 3-мэ афыте­гъэпсыхьэгъэщтых, — игущыIэ лъегъэкIуатэ врач шъхьаIэм. — Аужырэ шапхъэхэм адиштэрэ екIолIакIэхэр дгъэфедагъэх, псэуалъэр зэрифэшъуашэу зэтедгъэпсыхьащт. Зэрэдгъэ­на­фэрэмкIэ, IофшIэнхэр мы илъэ­сым ыкIэм нэс къаухыщтых.

Мыекъуапэ имызакъоу, респуб­ликэмкIи псэуалъэм мэхьанэшхо иI. Мыщ изэтегъэпсыхьан дакIоу Адыгеим къыщыхъухэрэ кIэлэцIыкIухэм япчъагъэ на­хьыбэ хъунэу тэгугъэ.

Терапевтическэ корпусым ишIыни Мыекъопэ къэлэ клиническэ сымэджэщым щырагъэ­жьагъ. ДжырэкIэ унэ лъакъор аухы. Врач шъхьаIэм къызэри­IуагъэмкIэ, псэуалъэр щэу зэтетыщт. Аужырэ шапхъэхэм адиштэу шъхьангъупчъэ инхэр зыхэлъыщт IэзэпIэ учреждением иапэрэ къат мафэрэ зыщяIэзэщтхэмрэ диагностическэ къулыкъумрэ тетыщтых. ЯтIо­нэрэ, ящэнэрэ къатхэм терапевтическэ отделениемрэ геронтологическэ къулыкъумрэ атетыщтых. Федеральнэ проект гъэнэфагъэу «Сейсмоустойчивость» зыфиIорэм къыдыхэ­лъытагъэу мыщ ишIын рагъэ­жьагъ, сомэ миллиони 104-рэ пэIуагъэхьанэу агъэнафэ.

Медицинэ учреждениякIэр мы илъэсым ыкIэм нэс къаухын гухэлъ зэряIэр Мыекъопэ къэлэ клиническэ сымэджэщым иврач шъхьаIэ къыIуагъ. АР-м ипащэ, псауныгъэр къэухъумэгъэнымкIэ Министерствэр IэпыIэгъушхо къызэрафэхъухэрэр, ахэм зэрафэразэр Вла­димир Лобода игущыIэ къыщыхигъэщыгъ.

ЦIыфхэм япсауныгъэ гъэпы­тэгъэнымкIэ, къагъашIэрэм хэ­гъэхъогъэнымкIэ республикэм Iофыгъуабэ щызэшIуахы, ­лъэпкъ проектхэм къахиубытэу IофшIэныр гъэпсыгъэным имэхьанэ зэрэиным Адыгеим и ЛIышъхьэу КъумпIыл Мурат къулыкъу пстэуми анаIэ тыраригъэдзагъ. Псау­ныгъэм икъэухъумэн ылъэныкъо къэкIопIэ пстэуми къа­хэ­кIыгъэ мылъкоу икIыгъэ илъэсым пэIуагъэхьагъэр сомэ мил­лиарди 6 мэхъу, мы илъэсым а пчъагъэр сомэ мил­лиарди 7-м рагъэхъунэу ары гухэлъэу щыIэр.

Гъонэжьыкъо Сэтэнай.
Сурэтхэр Iэшъынэ Аслъан тырихыгъэх.