Илъэсым изэфэхьысыжьхэм, пшъэрылъхэм атегущыIагъэх

Адыгэ Республикэм и ЛIышъхьэу КъумпIыл Мурат республикэм ипрокурорэу Игорь Шевченкэм тыгъуасэ IофшIэгъу зэIукIэгъу дыриIагъ. Шъолъырым ипрокуратурэ 2018-рэ илъэсым Iофэу ышIагъэм ипэшIорыгъэшъ зэфэхьысыжьхэм, республикэм игъэцэкIэкIо хэбзэ къулыкъухэм зэпхыныгъэу адыриIэр гъэпытэгъэнымкIэ анахьэу анаIэ зытырагъэтын фаехэм атегущыIагъэх. АР-м и ЛIышъхьэ зэIукIэгъум ипэублэ УФ-м ипроку­ратурэ иIофышIэ и Мафэ фэ­гъэхьыгъэ мэфэкIэу къэблагъэ­рэмкIэ прокурорым ыкIи мы къулыкъум зищыIэныгъэ гъогу езыпхыгъэхэм къафэгушIуагъ. Шъолъырым рэхьатныгъэ илъы­ным, социальнэ-экономикэ хэ­хъоныгъэхэр ышIынхэм ыкIи зэкIэми зэдыряпшъэрылъым, цIыфхэм ящыIэкIэ-псэукIэ на­хьышIу шIыгъэным, Адыгеим ипрокуратурэ иIахьышIу зэрэ­хэлъыр республикэм ипащэ хи­гъэунэфыкIыгъ.

— Хэбзэгъэуцугъэм къы-ди­­лъытэрэ лъэныкъо ­пстэури гъэ­цэкIэгъэным лъыплъэгъэнымкIэ прокуратурэм шIуагъэ къытэу иIофшIэн зэрэзэхищэрэр тэ­лъэгъу. ХэбзэухъумакIохэм яIо зэхэлъэу Iоф зэдашIэнымкIэ узипэщэ къулыкъум IофшIэнышхо зэшIуе­хы. Ащ ишыхьат хъу­гъэ-шIа­гъэхэр зыщамыгъэунэфы­гъэхэ мафэхэм япчъагъэ на­хьыбэ зэрэхъугъэр. Шъолъырым зыпкъ итэу хэхъоныгъэхэр ышIынхэмкIэ ащ мэхьанэшхо иI. ТапэкIи ащ фэдэ зэпхыныгъэ, зэгурыIоныгъэ тазыфагу илъэу Iоф зэдэтшIэным сыщэгугъы, — къыIуагъ КъумпIыл Мурат.

АР-м ипрокуратурэ икъулыкъушIэхэм ясэнэхьат хэшIыкIы­шхо зэрэфыряIэм, ветеранхэм шIуагъэ къытэу Iоф зэрадашIэ­рэм мэхьанэшхо яIэу АР-м и ЛIышъхьэ къыхигъэщыгъ.

Илъэсэу икIыгъэм ипэшIорыгъэшъ зэфэхьысыжьхэм Игорь Шевченкэр кIэкIэу къащыуцугъ, пшъэрылъхэр зэшIохыгъэнхэмкIэ прокуратурэмрэ респуб­ликэм игъэцэкIэкIо хэбзэ къулыкъухэмрэ шIуагъэ къытэу Iоф зэдашIэныр пстэуми анахь шъхьаIэу щытын фаеу къыIуагъ. Прокуратурэм икъулыкъухэр зызэхащагъэхэр илъэс 297-рэ зэрэхъурэм фэгъэхьыгъэ мэфэкI зэхахьэу щыIэщтым респуб­ликэм ипащэхэр хэлэжьэнхэу ригъэблэгъагъэх.

Адыгэ Республикэм и ЛIышъхьэ ипресс-къулыкъу.