Илъэси 7 хьапс тыралъхьагъ

Коммерческэ банкэу «Новация» зыфиIорэм ипащэу Iоф зышIагъэм ылъэныкъокIэ къызэIуахыгъэ уголовнэ Iофым Мыекъопэ къэлэ хьыкумыр хэплъагъ.

Хабзэр ыукъуи, иIэнатIэ къыз­фигъэфедэзэ ежь ифедэ хэлъэу цIыфхэм алъэныкъокIэ гъэпцIэгъэ Iоф зэрэзэрихьагъэм, ышIэзэ юридическэ лицор банкрот зэрэ­хъугъэм къыхэкIэу ар агъэмысэ.

Хьыкумым зэригъэунэфы­гъэмкIэ, 2014-рэ илъэсым чъэпыогъум къыщегъэжьагъэу 2017-рэ илъэсым ищылэ мазэ нэс банкым ипащэщтыгъэм зэкъорыпсэу чIыфэу аритыгъэр къызэратыжьыщтыр къэзыушыхьатырэ шыхьат ямыIэу физическэ ыкIи юридическэ лицэхэм сомэ миллиардым ехъоу, чIыфэ 30 фэдиз аритыгъ.

Коммерческэ организацием ипащэ гъэпцIэгъэ бзэджэшIа­гъэу зэрихьагъэм къыхэкIыкIэ чIыфэ зыштагъэхэ юридическэ лицэхэм банкым къыгъэуцухэрэ шапхъэхэмкIэ ахъщэр афэмытыжьэу банкрот хъугъэх.

Къэралыгъо гъэпщынакIом ышIыгъэ унашъом хьыкумым дыригъэштагъ ыкIи банкым ипащэщтыгъэм илъэси 7 хьапс тыралъхьагъ, ащ нэмыкIэу илъэ­сищрэ иIэнатIэ Iоф ришIэн фи­тыщтэп.

Адыгэ Республикэм и Про­ку­ратурэ ипресс-къулыкъу къы­зэритыгъэмыкIэ, мы унашъом кIуачIэ иIэ хъугъэ.