ИешIакIэ гум рехьы

Ксения Дьяченкэр Мыекъуапэ игандбол бзылъфыгъэ командэу «АГУ-Адыифым» иешIакIу. Республикэм ыцIэ спортышхом щызыIэтыхэрэм ащыщ.

Клубэу «Адыифым» аужырэ илъэсхэм зэхъокIыныгъабэ фэ­хъугъ. Илъэсыбэрэ щешIагъэхэр хэкIыжьыгъэх, кIэу аштагъэхэм яIэпэIэсэныгъэ хагъахъо. Ксения Дьяченкэр Урысыем ганд­бо­лымкIэ ихэшыпыкIыгъэ ныб­жьыкIэ командэ хэтэу дунэе зэIукIэгъухэм ахэлэжьагъ. 2018-рэ илъэсым пшъэшъэ ищыгъэр «Адыифым» къырагъэблэгъагъ.

Джабгъу лъэныкъом щыIэу ыпэкIэ илъыныр шэнышIу зы­фэхъугъэ К. Дьяченкэр чIыпIэ зэфэшъхьафхэм дэгъоу ащешIэ. Къэлапчъэм Iэгуаор дидзэным нахь фэщагъэу зэрэщытым ты­щыгъуаз.

«Кубань» Краснодар, «Ставрополье» Ставрополь, «Луч» Москва, фэшъхьаф командэхэм Ксение адешIагъ, иIэпэIэсэныгъэкIэ зэхэщакIохэм къыхагъэщыгъ. «ЕшIэкIо анахь дэ­гъу» зыфиIорэ щытхъуцIэр заулэрэ къыфагъэшъошагъ.

— «Адыифым» шэн-хэбзэ дэгъухэр иIэх. ЕшIакIохэр агу ихыгъэу къыспэгъокIыгъэх. Ныб­жьыкIэу хэтхэм ясэнаущыгъэ къызэIуахынэу, тикомандэ ауж къинэхэрэм къахэкIыжьынэу сэгугъэ, — къытиIуагъ Ксения Дьяченкэм.

— «Адыифыр» нахь лъэш зышIыгъэхэм Ксения Дьяченкэр ащыщ, — къеIуатэ трене-
рэу Ольга Рюхинам. — Пшъэшъэжъыер гандболым къыфэ­хъугъэу сэлъытэ. ЕшIапIэм зэхэщэн Iофхэр дэгъоу щегъэцакIэх, къэлапчъэм Iэгуаор дидзэнымкIэ амалышIухэр къегъотых.

Бзылъфыгъэхэм я Дунэе мафэ къэмысызэ К. Дьяченкэм гущыIэгъу тыфэхъугъ. Адыгэ Республикэм испорт псэуа­лъэхэр дахэу гъэпсыгъэхэу ащ елъытэ. Ти ЛIышъхьэу КъумпIыл Мурат, Правительствэм спортым зиушъомбгъунымкIэ Iофыгъуабэ зэрагъэцакIэрэм ар щыгъуаз. Спортышхом щылъыкIотэным, Джэнчэтэ СултIан лъапсэ зыфишIыгъэ клубэу «Адыифыр» дунаим нахь щашIэным фэшI Ксение зичэзыу зэIукIэгъухэм зафегъэхьазыры.