Игорь Овчинниковыр агъэнэфагъ

Урысые Федерацием хэгъэгу кIоцI IофхэмкIэ и Министерствэ иотделэу Мыекъуапэ щыIэм ипащэ игуа­дзэу – полицием ипащэу подполковникэу Игорь Овчинниковыр агъэнэфагъ. Ащ фэгъэхьыгъэ унашъом Адыгеим хэгъэгу кIоцI IофхэмкIэ иминистрэ ипшъэ­рылъхэр зыгъэцэкIэрэ полковникэу БрантI Мурадин кIэтхагъ.

Отделым ипащэ игуадзэу агъэнэфэгъакIэр БрантI Мурадин IофышIэ купым нэIуасэ фишIызэ, подполковникэу Игорь Овчинниковыр зисэнэхьат хэшIыкIышхо фызиIэ цIыфэу, илъэсыбэрэ Iоф ышIагъэу зэрэщытыр къариIуагъ.

Хэгъэгу кIоцI IофхэмкIэ органхэм 1993-рэ илъэсым къыщегъэ­жьагъэу ар ахэт. Урысыем и МВД имилицие ихэушъхьафыкIыгъэ гурыт еджапIэу Астрахань дэтым «ХэбзэухъумэкIо IофшIэныр» зыфиIорэ сэнэхьатымкIэ щеджагъ. Ащ ыуж юридическэ институтэу Ростов дэтыр 2000-рэ илъэсым къыухыжьыгъ.

Уголовнэ лъыхъоным иподразделениехэм илъэс 20-м ехъурэ IэнэтIэ зэфэшъхьафхэр ащигъэцэкIагъэх. Джы мы IэнатIэм Iумы­хьэзэ уголовнэ лъыхъонымкIэ Мыекъопэ район отделым ипащэ игуадзэу щытыгъ.