ЗэхъокIыныгъэхэр фашIых

Хьылъэ ыкIи цIыфхэр зезыщэхэрэ транспортым пае Яблоновскэ лъэмыджыр зэрэзэфашIырэм лъапсэу иIэр ыкIи ащ къыкIэлъыкIощтыр къыIотагъ къалэу Краснодар имэрэу Евгений Первышовым.

Ащ къызэриIуагъэмкIэ, транспортыр зэрэзекIощтым епхыгъэ IофшIэным зэхъокIыныгъэхэу фашIыхэрэм ыуж Тургеневскэ ыкIи Яблоновскэ лъэмыджхэм арыкIорэ пчъагъэм къыщыкIэщтэп. ПсэолъакIэ ашIыфэкIэ шапхъэхэм адиштэу Яблоновскэ лъэмыджыр агъэфедэщт.

БлэкIыгъэ илъэсым лъэмы­джым ышъхьагъ агъэпытагъ, чIыпIэ гъэнэфагъэхэм гъэцэ­кIэжьынхэр арашIылIагъэх. Ау лъэмыджыр зыIыгъхэ пкъыгъо­хэм анэсыгъэхэп. Специалистхэм зэхащагъэхэ ушэтынхэм къызэрагъэлъэгъуагъэмкIэ, транспорт хьылъэм ыпкъ къи­кIыкIэ лъэмыджым ищызекIон къызэтеуцон ылъэкIыщт. Ащ къы­хэкIэу хьылъэ ыкIи цIыфхэр зезыщэрэ транспортыр къызэтырагъэуцонэу унашъо ашIыгъ. Транспортыр зыщызекIон ылъэ­кIыщт нэмыкI маршрутхэр агъэ­нафэх.

Сыда мы Iофыр къызщежьагъэр?

ЫпэкIэ къызэратыгъэу, бэ­дзэогъум и 12-м щегъэжьагъэу Адыгеим ипоселкэу Яблоновскэмрэ къалэу Краснодаррэ зэзыпхырэ лъэмыджыр хьы­лъэзещэ машинэхэм ыкIи автобусхэм апае (ащ хэхьэ маршрутнэ таксир) зэфашIыщт. ГъогурыкIоным ишапхъэхэр ыукъо­хэзэ мы лъэмыджым къытехьэрэ хьылъэзещэ транспортыр ары анахьэу мыр зыфэгъэхьыгъэр.

Мыщ фэдэ екIолIакIэм къыкIэлъыкIоу транспортым изы Iахь Тургеневскэ лъэмыджымкIэ ягъогу рыкIощт. Ащ фытегъэ­псыхьагъэхэ тамыгъэхэр чIыпIэ гъэнэфагъэхэм ащагъэуцущтых: Краснодар ылъэныкъокIэ —КПП-м дэжь, АдыгеимкIэ — лъэмыджым укъызщыдэкIоещтым.

ЛъэмыджыкIэм ишIынкIэ амалэу щыIэхэр

Яблоновскэ лъэмыджыкIэм ишIын зэкIэмкIи сомэ миллиарди 7 — 9 фэдиз тефэнэу къа­лъытагъ. УФ-м транспортымкIэ и Министерствэ илъэсищым те­лъытэгъэ проектэу ыгъэнэфагъэм (2020 — 2022-рэ илъэс­хэр) псэуалъэм игъэпсын хи­гъэхьан гухэлъ щыI. Ащ фытегъэпсыхьэгъэ проекти агъэхьазырыгъ.

Яблоновскэ лъэмыджым фэдэ псэуалъэ (идублер) шIыгъэным щытегущыIагъэх УФ-м и Къэралыгъо думэ изэхэсыгъоу 2019-рэ илъэсым мэзаем зэхащагъэм къыдыхэлъытэгъэ «правительственнэ сыхьатым». Лъэпкъ проектэу «Автомобиль гъогухэр щынэгъончъэнхэр ыкIи шэп­хъэшIухэм адиштэнхэр» зыфи­Iорэр гъэцэкIагъэ зэрэхъущтым профильнэ ведомствэм ипащэу Евгений Дитрих къытегущыIэзэ хэбзэгъэуцухэм яупчIэхэм джэуапхэр къаритыжьыгъэх, анахьэу анаIэ зытырагъэтыщтхэ лъэныкъохэр къыгъэнэфагъэх.

Шъугу къэдгъэкIыжьын, псы­хъоу Пшызэ телъ Яблоновскэ лъэмыджыр 1952-рэ илъэсым ашIыгъ. Ар пхъэм хэшIыкIыгъэ лъэмыджэу 1826-рэ илъэсым лъэсрыкIохэм апае агъэпсыгъа­гъэм ычIыпIэ къиуцуагъ. ЗэкIэмкIи икIыхьагъэ метрэ 795-рэ, ишъомбгъуагъэ — метри 9, псым щегъэжьагъэу илъэгагъэ метрэ 18 мэхъу.

Мафэ къэс гурытымкIэ машинэ мин 20 фэдиз Ябло­новскэ лъэмыджым къырэкIошъ, Краснодар дахьэх, джащ фэдизмэ Тургеневскэ лъэмыджыр зэпачы.

(Тикорр.).