Зэрэщыгугъыгъэхэр къегъэшъыпкъэжьы

Пэщэ IэнатIэм кIэу Iухьэрэм сыдигъокIи цIыфхэм гугъэпIэ инхэр рапхых, хэхъоныгъэхэм, нахьышIум ылъэныкъокIэ зэхъокIыныгъэхэм яжэх, ау ащ дакIоу цыхьэшхо фашIыными тещыныхьэх.Ежьхэм яшIоигъоныгъэкIэ амакъэхэр фатыхи хадзыгъэми, кIэгъожьынхэм охътабэ ищыкIагъэп. ГугъапIэхэр къэбгъэшъыпкъэжьынхэр, узэрэтехьагъэм кIэмыгъэгъожьынхэр зэрэмыIэшIэхыр нафэ. ЦIыфхэр ятеплъэ­кIэ зэрэзэтекIыхэрэм фэдэу ядунэееплъыкIи, щыIэныгъэм зэрэфыщытхэри зэфэшъхьаф.
Адыгэ Республикэм и ЛIышъхьэу КъумпIыл Мурат илъэсыбэрэ Правительствэм ипэща­гъэу, зэшIохыгъэ хъугъабэхэм иIахь ахилъхьагъэу, зыцIэ ашIэрэ цIыфэу иIэнатIэ Iухьагъ нахь мышIэми, зыгу щэч къи­хьан къэхъугъ. Ежь нэмыкI техьагъэми, аущтэу цIыфхэр егупшысэщтгъагъэх. ЩыIэны­гъэр ары зэрэщытыр. ИлъэситIоу а IэнатIэм зыIутым зэрэщыгу­гъыгъабэ къызэригъэшъыпкъэ­жьырэр нафэ хъугъэ.
Адыгеим исхэр псэолъакIэу, гъогукIэу къашIыхэрэм, жъэу агъэцэкIэжьхэрэм, агъэкIэжьхэрэм, псэупIэхэр зэрэзэтырагъэпсыхьэхэрэм, ахэр нахь къабзэ зэрэхъугъэхэм ащэгушIукIых, ау зэпстэумэ анахьэу ягуапэр нахьыпэкIэ аущтэу щымытыгъэу джы республикэм ипащэ цIыф къызэрыкIохэм апэблагъэ зэрэхъугъэр ары.
НахьыпэкIэ ЛIышъхьэр зыдэмыхьэгъэ псэупIэхэр къызэрикIухьэхэрэр, ахэм адэс цIыф къызэрыкIоу зиеплъыкIэхэр зэфэшъхьафхэм ахэхьаным, ядэIуным, агу илъыр къаригъэ­Iоным, джэуап аритыжьыным зэрэтемыщыныхьэрэр апэрэ мафэхэм агъэшIагъощтыгъ, джы ягуапэу игугъу ашIы. Респуб­ликэм ипащэ нахь мышIэми, ышъхьэ римыпэсхэу, къыухьанхэу зэримыIорэр, нэщх-гущхэу, зэIухыгъэу зэрапэгъокIырэр бэмэ агъэшIагъо. Зэрахахьэрэм имызакъоу, Интернет нэкIубгъо­хэр ыгъэфедэхэзэ цIыфхэм гущыIэгъу афэхъу, упчIэ зиIэу зыкъыфэзыгъазэрэ е зиIофыгъо къезыхьылIэрэ зыпари джэуапынчъэу къыгъанэрэп.
ЗэкIэми зэфэдэу гущыIэ дахэхэр къызэрамыIощтхэр хэткIи шъэфэп, ыгу римыхьырэр ымыушъэфэу республикэм ипащэ фэзытхыхэрэри къахэкIых. Интернет нэкIубгъохэм ащыщ пштэу, республикэм ихъухьэ­хэрэм къараIуалIэхэрэм уза­лъыплъэкIэ ар дэгъу дэдэу къыбгурэIо. Зым чъыг е кондэ ныбжьыкIэ агъэтIысхьагъэмэ, ар гуапэ щыхъоу ЛIышъхьэм фетхы, адрэм лъэхъаным диштэу зэтегъэпсыхьэгъэ сымэджэщыкIэ е кIэлэцIыкIу IыгъыпIакIэ къашIыгъэми, ымыгъэразэу риIолIэныбэ къегъоты. Джащ фэдэхэм джэуапэу КъумпIыл Мурат аритыжьыхэрэм узалъыплъэкIэ, Iэдэбрэ щэIэгъэшхорэ зыхэлъ цIыфэу зэрэщытыр нафэ къыпфэхъу.
Непэ щыIэныгъэр псынкIэ дэдэу пIон плъэкIыщтэп, ащ хэкIыжьынхэр цIыфхэм къызэрыкIо къафэхъурэп. Ари яду­нэееплъыкIэ зэзыхъокIыхэрэм зэу щыщ. Республикэм урипащэу ар къыбгурыIоу, зэхэпшIыкIэу, щэIагъэ афыуиIэу джэуап яптыжьышъумэ, зищыкIагъэми удеIэшъумэ, осэ ин къызэрэпфашIыщтым Iо хэлъэп. Ау ар цIыфыр зэрапIугъэм, зэрагъэсагъэм елъытыгъ.
ЕтIани КъумпIыл Мурат цIыфхэм шIу языгъэлъэгъугъэ­хэм ащыщ республикэм исхэр Интернетыр агъэфедэзэ къызкIэлъэIухэрэр, предложениеу къахьыхэрэр сыдигъокIи къызэрэдилъытэхэрэр. БгъэцэкIэн умылъэкIынэу е законым къыщыдэмылъытагъэу къахэкIырэри мышъхьахэу, Iэпэдэлэл ымышIэу зэхэугуфыкIыгъэу афетхыжьы, агурегъаIо. А зэпстэумэ цIыфхэм уасэ афамышIын алъэкIыщтэп.
Правительствэм ипащэу зыщэтым зы чIыпIэ бэрэ исыныр, зэхэсыгъо кIыхьэхэм, гущыIэным охътабэ атыригъэкIодэныр икIасэщтыгъэп, Iуагъэр нахь макIэу, шIагъэр нахьыбэн фаеу ылъытэщтыгъ. Ащ фэдэ Iоф­шIакIэ зиIэхэми афидэщтыгъэп. ЛIышъхьэ IэнатIэм зыIохьэм, ар нахь лъэшыжьэу къыхэщыгъ. ЗыпарэкIи зимыгъэпсэфырэм фэд, зэкIэми алъыIэсынэу игъо ефэ. Непэ Iофтхьэбзэ зэфэшъхьаф зытIущ зэхимыщэу къы­хэкIырэп, ащ дакIоу псэолъэ заулэ къыкIухьани елъэкIы.
КъумпIыл Мурат, Урысыем исубъектхэм япащэхэр пштэхэмэ, анахь ныбжьыкIэхэм ащыщ. Адыгеим пащэу иIагъэхэр пштэхэми, ащ фэдэ ныбжь иIэу мы IэнатIэм а зыр арэу мэхъу Iухьагъэр. Лъэхъаным дыри­гъэштэным, кIуачIэрэ щэIагъэрэ иIэу пшъэрылъ пстэури пхырищыным, республикэм хэхъоныгъэхэр езыгъэшIыщтхэ идее гъэшIэгъоныбэхэр рихьыжьэнхэм щымыщынэным, гу атыри­шIыхьаным, ахэр лъигъэкIотэнхэм а ныбжьыр арын фае нахьыбэу фэIорышIэрэр. Ау ащ имызакъоу, аущтэу щытыным пае ыгу къыдеIэу иреспубликэ, цIыфэу исхэм афэгумэкIыни фае. Ар зэрэхэлъыр иIофшIакIэ къегъэлъагъо.
НэкIубгъор
зыгъэхьазырыгъэр
ХЪУТ Нэфсэт.