Зэрар къымыхьэу

ООО-у «ЭкоЦентр» зыфиIорэм респуб­ли­­­кэм хэкIэу къыщиугъоирэр зэрищэлIэщт «эко­технопарк» Мыекъопэ районым иста­ни­цэу Кужорскэм дэжь щигъэуцунэу проектыр егъэхьазыры.

Проектым хэкIыр зыщызэха­дзыщт комплексышхо, чIыгъэшIу­хэр ащ зыщыхашIыкIыщт чIыпIэ ыкIи коммунальнэ пы­дзэфэ пы­­тэхэм апае полигон къыщыдэлъытагъэх, хэкI зэхэтэкъуагъэу къыращалIэрэр зэ­хэдзы­гъэнэу ыкIи къыдэгъэ­кIыжьы­гъэнэу амалхэр иIэщтых. Бгъэ­кIодын умылъэкIыщтхэр ары полигоным ащэщтхэр. ЧIычIэгъыпсыхэм шIоир ахэмыхьаным, машIом зыкъыщимыштэным апае лъэхъа­ным къыздихьыгъэ шIыкIэ гъэ­нэфагъэхэр агъэфе­дэщтых. Мы хъызмэтшIапIэм машIуи, Iугъуи хэмытхэу, цыгъо, шъуае зыфэпIощтхэри хэмы­хъохэу пыдзафэ­хэм адэзекIо­гъэн амал къытыщт.

ХэкIыр зэращэлIэщт ыкIи зыщызэхадзыщт чIыпIэм ты­къэзыуцухьэрэ дунаим иягъэу ригъэкIын ылъэкIыщтым пэшIорыгъэшъэу уасэу фашIыгъэм Мыекъопэ район админист­рацием щытегущыIагъэх. Ащ ыпэкIэ ар зэрэгъэпсыгъэщтым, къыщыдэлъытэгъэщтхэм рес­публикэм исхэр ащагъэгъоза­гъэх, яеплъыкIэхэр зэрагъэ­шIагъ. Джыри мы общественнэ тегущыIэнхэми проект ухыгъэм къыщыдэлъытэгъэн фаехэмкIэ яшIошIхэр къащаIуагъ.

Мы уахътэм региональнэ пар­кым ипроект экологиемкIэ къэралыгъо уплъэкIунхэм афагъэхьазыры.