Зэнэкъокъум фэхьазыр

«Зэкъошныгъ» Мыекъуапэ – «Челябинск» Челябинск – 3:1.
Ныбджэгъу ешIэгъур гъэтхапэм и 3-м Шъачэ щыкIуагъ.
«Зэкъошныгъ»: Гиголаев (Ковалев, 46), Хьа­гъур, Катаев, Бровчук, Черов, Къонэ, Ма­монов, Белов, Ахмедханов, Домшинский, Iащэ.
Къэлапчъэм Iэгуаор дэзыдзэгъэ тиешIакIохэр: Кадимов, Домшинский, Мамонов.

— Ныбджэгъу ешIэгъум мэхьэнэ хэхыгъэ иIагъ, — къыти­Iуагъ «Зэкъошныгъэм» итренер шъхьа­Iэу, Адыгэ Республикэм изаслуженнэ тренерэу Ешыгоо Сэфэрбый. — Гъэтхапэм и 15-м илъэс ешIэгъум пытыублэжьыщт. Ар къыдэтлъыти, яIэпэIэсэныгъэ­кIэ тикомандэ диштэрэ ешIа­кIохэм такIырыплъыгъ. «Зэ­къошныгъэр» бэрэ ыпэкIэ илъыщтыгъ. Пчъагъэр 3:0 зэ­хъум, ешIэкIо заулэ зэIукIэгъум щызэблэтхъугъ.

Гъэтхапэм и 15-м «Зэкъошныгъэр» Ставрополь щыIукIэщт чIыпIэ командэм. ТиешIакIохэр тыгъуасэ Мыекъуапэ къэкIожьыгъэх. С. Ешыгуаом зэрилъытэрэмкIэ, «Зэкъошныгъэм» хэгъэгум изэнэкъокъу дэгъоу зыфигъэхьазырыгъ.