«Зэкъошныгъэр» лъэкIуатэ

«Зэкъошныгъ» Мыекъуапэ – «Легион» Махачкала – 1:0.
Мэлылъфэгъум и 6-м Адыгэ республикэ стадионым щызэдешIагъэх.
Зезыщагъэхэр: А. Колтунов – Ростов-на-Дону, Д. Мирошник — Ставрополь, Р. Шустров – Крымск.
«Зэкъошныгъ»: Ковалев, Кирьян, Катаев, Бровчук, Черов, Къонэ, Ахмедханов, Ещенко, Мамонов, Iащэ, Домшинский.
Делэкъор, Кадимовыр, Крыловыр, Хьагъурыр ятIонэрэ едзыгъом ешIапIэм къихьагъэх.
Къэлапчъэм Iэгуаор апэрэ едзыгъом щыдэзыдзагъэр: Ризван Ахмедханов.«Зэкъошныгъэм» иешIакIохэм текIоныгъэр къыдахыным фэшI гуетыныгъэ къызыхагъэфагъ. Де­лэкъо Аскэр «Легионым» икъэлапчъэ благъэу зекIум, ухъума­кIохэм аIэкIэкIыгъ, пчъагъэм хигъэхъонымкIэ амалышIухэм алъыхъугъ. Хъагъэм Iэгуаор римы­дзагъэми, «Легионым» иешIакIохэр зэригъэгумэкIыгъэхэр тигопагъ.

«Легионым» икъэлэпчъэIутэу А. Магомедовыр чыжьащэу ыпэкIэ къызэрэлъыкIотагъэр Антон Мамоновым зелъэгъум, псынкIэу къэлапчъэм дэуагъ. КъэлэпчъэIутым Iэгуаор шъхьарыкIыгъ, ау ухъумакIохэм ащыщ Iэгуаор къызэкIидзэжьынэу игъо ифагъ.

ЕшIэгъур кIэухым факIозэ Саид Алиевыр тикъэлапчъэ благъэу гъогогъуитIо къекIугъ, метри 4 – 5-кIэ пэчыжьэу къэлапчъэм ар къыдэуагъ. «Зэкъошныгъэм» икъэ­лэпчъэIутэу Роман Ковалевым чэтыум зызэридзырэм фэдэу шIыкIэ гъэшIэгъонхэр ыгъэфедэхэзэ, Iэгуаор гъогогъуитIо къыубытыжьыгъ. ТиешIакIохэу Къонэ Амир, Ризван Ахмедхановыр, нэмыкIхэри «Легионым» икъэлапчъэ пхъашэу зэрэдэуагъэхэм зэIукIэгъур къыгъэдэхагъ.

Пресс-зэIукIэр

— Республикэм щыщ ешIакIохэр тэгъасэх. КъэкIощт илъэсым зэнэкъокъум къыщыдэтхыщт чIыпIэм нахь тегупшысэщт, — къы­Iуагъ «Легионым» итренер шъхьа­Iэу Анзур Садиковым. — Къэлап­чъэм Iэгуаор дадзэнэу тиешIакIохэр чIыпIэшIу ифэщтыгъэх, ау гъэхъагъэ ашIыгъэп.

— ТекIоныгъэр къызэрэдэтхыщтыр ары анахьэу тызыпылъы­гъэр, тиешIакIохэм сафэраз. Къэлэпчъэ­Iутэу Роман Ковалевыр Владикавказ дэгъоу зэрэщешIагъэр къыдэтлъыти, «Легионым» икоман­дэ тызыIокIэм, къэлапчъэм Iудгъэ­уцуагъ, — къыIуагъ «Зэкъошныгъэм» итренер шъхьаIэу Ешыгоо Сэфэрбый.

ЕшIэгъухэр

Я 21-рэ ешIэгъухэм якIэуххэр зэтэгъапшэх.
«Чайка» — «Академия» — 3:0. «Спартак» Нч – «Волгарь» — 1:2, «Черноморец» — «Урожай» — 1:2, СКА – «Мэщыкъу» — 2:2, «Динамо» — «Спартак» Вл — 0:2, «Краснодар-3» — «Черноморец» — 3:0.

ЧIыпIэхэр

1. «Чайка» — 50
2. «Урожай» — 47
3. «Волгарь» — 40
4. «Зэкъошныгъ» — 33
5. «Черноморец» — 33
6. «Биолог» — 33
7. «Легион» — 27
8. «Спартак» Нч – 26
9. «Мэщыкъу» — 19
10. «Спартак» Вл – 18
11. «Динамо» — 18
12. «Краснодар-3» — 17
13. СКА – 17
14. «Ангушт» — 14
15. «Академия» — 9.
Я 22-рэ зэIукIэгъухэр
12.04
«Краснодар-3» — «Биолог»
«Волгарь» — «Черноморец»
«Легион» — «Динамо»
«Спартак» Вл – «Мэщыкъу»
«Спартак» Нч – СКА
«Урожай» — «Ангушт».

«Академиер» зэнэкъокъум хэкIыжьыгъэшъ, «Зэкъошныгъэр» а мафэм ешIэщтэп.

ЕМТIЫЛЪ Нурбый.