Зэгуцафэхэрэр къаубытыгъ

Илъэс 16 зыныбжь Дарья Шопинау зыдэхъугъэр амышIэрэм икIодыкIэ фэгъэхьыгъэ уголовнэ Iофыр Урысые Федерацием и Следственнэ комитет и ГъэIорышIапIэу Адыгэ Республикэм щыIэмрэ хэгъэгу кIоцI IофхэмкIэ Министерствэмрэ якъулыкъушIэхэм зэхафы.

ЫпэкIэ къызэратыгъэмкIэ, 2019-рэ илъэсым жъоныгъуакIэм и 24-м сыхьатыр 11.10-м Мыекъуапэ илицееу N 34-м пшъэшъэжъыер къычIэкIыжьи, ядэжь къыгъэзэжьыгъэп.

Следственнэ органхэм лъэтемытэу уголовнэ Iоф я 105-рэ статьямкIэ (укIыгъэ Iоф) къызэIуахыгъ. Сле­довательхэмрэ оперативнэ IофышIэхэмрэ чанэу зэрэзэдэлэжьагъэхэм ишIуагъэкIэ, зыукIыгъэу зэгуцафэхэрэр къаубытыгъ. Ар ыпэкIэ хьапсым чIэсыгъэ хъулъфыгъэу илъэс 47-рэ зыныбжьыр арэу къычIэ­кIыгъ.

Мы уахътэм следственнэ Iофтхьабзэхэр рекIокIых. Непэ мыщ фэгъэхьыгъэ пресс-конференцие следственнэ комитетым къыщатыщт. Ащ нахь игъэкIотыгъэу къэбарыр къыщаIотэщт.