Зытехъухьэрэр зэхафы

Научнэ-исследовательскэ гупчэм испециалистхэр псэупIэу Абадзехскэм къыригъэблэгъэнхэу Мыекъопэ районым ипащэ гухэлъ ышIыгъ. Ащ лъапсэ фэхъугъэр псэупIэм псыр ренэу къызэрэкIахьэрэр ары. Псыр зэрэращырэ шIыкIэр специалистхэм ауплъэкIущт.

Урысые Народнэ фронтым ишъолъыр къутамэу Адыгэ Республикэм щыIэм иIофышIэ­хэмрэ Абадзехскэм щыпсэухэрэмрэ заIокIэм, районым ипащэ мыщ фэдэ гухэлъ зэ­риIэр къыIуагъ. Зэхахьэм къе­кIолIагъэхэм къызэрэ­хагъэщы­гъэмкIэ, псэупIэм псыр къызэ­ракIаорэм епхыгъэ гумэкIыгъо­хэр зяIэр илъэс пчъагъэ хъугъэ.

Абадзехскэм щыщхэм къы­зэраIуатэрэмкIэ, ощх е ос къы­зэрехэу ячIыгухэм псыр къа­кIэхьэ. Бгышъхьэм тесхэри мыщ фэдэ гумэкIыгъо хэфэх. ЧIыунэхэр мэкIодых, лъачIэхэр зэхэтакъох, чъыгхатэхэр мэ­шъух, цIыфхэм алэжьыгъэр илъэс къэс ратэкъужьы. Мы гумэкIыгъор зэхафынэу, хэкIы­пIэ къагъотынэу цIыфхэр районым ипащэ пчъагъэрэ зыфа­гъэзагъ. ЧIанагъэм пэIухьанэу ахъщэ къаратыжьыщтыгъэ, ау зэрарэу ашIыгъэм ар кIахьэ­щтыгъэп. Ащ нэмыкIэу, цIыфхэм къызэраIуагъэмкIэ, канализациер амыукъэбзэу охътабэ ты­рагъэшIагъ.

— Документхэм афэгъэзэгъэ Iофыр зэрифэшъуашэу ыгъэ­цэкIэн ыкIи псыр къакIэоным ушъхьагъоу фэхъурэр къэзы­гъотын зылъэкIыщт специалист мыщ щыпсэурэ цIыфхэм Iэ­пыIэгъу къафэхъун фае, — къыIуагъ Урысые Народнэ фронтым ишъолъыр къутамэу Адыгэ Республикэм щыIэм иштаб хэтэу Юрий Гороховым. — Гъэстыныпхъэ шхъуантIэр къызэрыкIорэ ыкIи псыр зэрэращырэ коммуникациехэр унэхэм зэрапэблагъэм къыхэ­кIэу а гумэкIыгъор мыщ щыпсэухэрэм зэшIуахын алъэ­кIыщтэп.

(Тикорр.).