Зыпари ыгъэфыкъуагъэп, ау…

БлэкIыгъэ тхьаумафэм, мэкъуогъум и 16-м, Мыекъуапэ жьыхьарзэшхо къышъхьащыхьи, ащ ошъу къыздихьыгъ.

Адыгеим икъэлэ шъхьаIэ ошъур апэрэп къызэрэщехырэр, ау мызыгъогум ошъуцэхэр зэрэиныгъэхэм фэдэу бэрэ къыхэкIырэпти, цIыфхэм сурэтхэр тырахыгъэхэу социальнэ интернет нэкIубгъохэм бэу къарагъэхьагъэх. Ахэм къызэрагъэлъагъорэмкIэ, дэшхом фэдиз хъунхэри къехыщтыгъэх.

УФ-м и МЧС АР-мкIэ и ГъэIорышIапIэ ипресс-къулыкъу къызэрэщытаIуагъэмкIэ, ошъур иныгъэми, зыгорэ ыгъэфыкъуа­гъэу макъэ къарагъэIугъэп, къэлэ кIоцIым зэрарышхо къыщихьыгъэуи агъэунэфыгъэп. Ощх-ошъу зэхэтыр зыщыкIогъэ уахътэм электроэнергиер зэпыугъагъ, ау шIэхэу ар зэтырагъэ­уцожьыгъ.

Арэу щытми, ошъум чъыгхэр, куандэхэр, къэгъагъэхэр ыутыгъэх, къалэм имэкъумэщ чIыгухэм лэжьыгъэу ащыхалъхьагъэми иягъэ аригъэкIыгъ. Мы уахътэм къэлэ администрацием мэкъу- мэщымкIэ иотдел ом зэрарэу къыхьыгъэр зыфэдизыр къелъытэ.

МЧС-м и ГъэIорышIапIэ къызэрэщаIуагъэмкIэ, ошъум пэшIуе­кIорэ къулыкъум Iофтхьабзэу зэшIуихыгъэхэр мыхъугъэемэ, джыри нахьыбэу ащ иягъэ къэкIощтгъагъэ. Ахэм яшIуагъэкIэ къалэм зэрэщытэу ар къыщехыгъэп, район заул ныIэп къызэлъиубытыгъэр. Къулыкъум къызэрэщаIуагъэмкIэ, ошъум пэшIуе­кIорэ ракетэ 30 Мыекъуапэ дэжькIэ щыдагъэкIоягъ.

ХЪУТ Нэфсэт.