ЗыгъэпсэфыпIэр гуIэтыпIэу щытыщт

Адыгеим икъэлэ шъхьаIэ мафэ къэс нахь кIэракIэ зэрэхъурэр тинэрылъэгъу. Ащ изэтегъэпсыхьан фэIорышIэхэрэ къэралыгъо программэхэр етIупщыгъэу пхыращых. Ахэм зэу ащыщ проектэу «Формирование комфортной городской среды» зыфиIорэр.

Общественнэ чIыпIэхэм язэтегъэпсыхьан епхыгъэ IофшIэнхэм Адыгеим и ЛIышъхьи, къа­лэм ипащэхэри лъэшэу алъэп­лъэх. ЛIышъхьэу КъумпIыл Мурат муниципалитетым пшъэрылъ фигъэуцугъ къэлэ псэукIэ Iэ­ры­фэгъу гъэпсыгъэнымкIэ программэр пхыращы зыхъукIэ IофшIэнхэр зэрагъэцакIэхэрэм лъэшэу лъыплъэнхэу, Iофым фэгъэхьыгъэ къэбарыр цIыфхэм алъагъэ­Iэсынэу ыкIи ахэм яшIошIхэр къыдыхалъытэнхэу.

Мы федеральнэ программэшхом къыдыхэлъытагъэу 2018-рэ илъэсым Мыекъуапэ иобщественнэ чIыпIи 4 зэтырагъэ­псыхьанэу агъэнэфагъ. Джыдэдэм IофшIэнхэр жъотэу зыщыкIохэрэм ащыщ Зэкъошныгъэм игупчэ. Подрядчикэу зэ­нэкъокъур къыдэзыхыгъэм псэ­олъэшIын IофшIэнхэу ригъэ­кIокIыхэрэм нэбгырэ 50 фэдиз ыкIи хэушъхьафыкIыгъэ техники 7 ахэлажьэх.

IофшIэнхэр зэрэлъыкIуа­тэхэрэм тыщигъэгъозагъ Мые­къопэ къэлэ администрацием ипресс-къулыкъу илIыкIоу Надежда Гусевам. Ащ къызэриIуа­гъэмкIэ, скверым игъэцэкIэ­жьын къыхеубытэх лъэсрыкIо гъогоу квадратнэ метрэ мини 10-м ехъурэм плиткэ телъхьэгъэныр. Загъэпсэфыныр зикIа­сэхэм тIысыпIакIэхэр афа­гъэуцущтых, остыгъэхэр палъэщтых. Анахь шъхьаIэу, зыми фэмыдэу мы зыгъэпсэфы­пIэм щашIыщтыр къэнэфырэ музыкальнэ фонтан гъушъэр ары. Ащ ычIэ гранит плиткэхэмкIэ лъэпкъ тхыпхъэхэр хагъэпкIэщтых.

Мы уахътэм IофшIэнхэм япроцент 30-р агъэцэкIагъ: чIыпIэр къэзыгъэнэфыщтхэ остыгъэхэр зыпылъыщтхэ пкъэу­хэр агъэуцух, лъэсрыкIо гъогу­хэм анэзхэр агъэчъых, фонтаным ычIэ агъэхьазыры.

ЗэрагъэнафэрэмкIэ, Зэкъошныгъэм игупчэ изэтегъэпсыхьан епхыгъэ IофшIэнхэр мы илъэ­сым ыкIэ нэс аухыщтых. Ащ сомэ миллион 67-м ехъу пэIуагъэ­хьагъ. Проектым къызэрэди­лъытэрэмкIэ, саугъэтэу «ЗыкIыныгъэмрэ ЗэгурыIоныгъэмрэ» зыфиIорэмрэ Зэкъошныгъэм ипчэгурэ зэтырагъэпсыхьэрэ скверым зэрипхыщтых.

Iэшъынэ Сусан.
Сурэтхэр Надежда Гусевам тырихыгъэх.