Законым къыухъумэщтых

Урысыем и Президентэу Владимир Путиныр псэолъэшIынымкIэ шэпхъакIэхэм атехьэгъэным, эскроу-счетхэр гъэфедэ­гъэн­хэм атегъэпсыхьэгъэ законым бэдзэогъум и 4-м кIэтхагъ.

ПсэолъэшIыным зимылъку хэзылъхьэхэрэм яшIоигъоны­гъэкIэ 2018-рэ илъэсым бэдзэогъум и 1-м къыщегъэжьагъэу эскроу-счетхэр агъэфедэн фит­хэмэ, 2019-рэ илъэсым бэдзэогъум и 1-м къыщегъэжьагъэу ахэр дэх имыIэу агъэфедэнхэ фае.
Зимылъку псэолъэшIыным хэзылъхьэхэрэм яахъщэ зэрэмыкIодыщтымкIэ законыкIэм гугъапIэхэр къаретых. Партиеу «Единэ Россием» и Генсовет и Президиум зиахъщэ псэолъэ­шIыным пэIузыгъахьэхэрэм яфитыныгъэхэр къэухъумэгъэнхэмкIэ икуп псэуалъэм ыуасэ зыщыхагъэхъорэ псэолъэшIыпIэхэр къыхигъэщыщтых ыкIи Урысыем псэолъэшIынымкIэ, псэупIэ-коммунальнэ хъызмэтымкIэ и Министерствэрэ республикэм ихэбзэ Iэшъхьэтетхэмрэ ягъусэу а лъэныкъомкIэ ищыкIэгъэ амалхэр зэрихьащтых. Ащ фэгъэхьыгъэу къы-Iуагъ купым ипащэу, Къэралыгъо Думэм псэупIэхэм япхыгъэ по­литикэмкIэ ыкIи ЖКХ-мкIэ и Комитет итхьаматэ иапэрэ гуа­дзэу Александр Сидякиным.

«Законым фашIыгъэ гъэтэ­рэзыжьынхэм атетэу псэолъэшIыным зиIахь хэзылъхьэрэм имылъку зыпэIухьащтыр ежь зычIэсыщт унэр ары. ПсэолъэшIын IофшIэнхэр зэхэзыщэрэм псэолъэшIыным зиIахь къыхэзылъхьэхэрэм яахъщэ къызыфигъэфедэ шIоигъомэ, банк гъэ­нэфагъэм иэскроу-счет ар щерэугъой, цIыфым фэтэр зыратыхэкIэ ахъщэр ащ IорэкIэжь. Ахъщэу къыIэкIахьэрэр псэолъэ гъэнэфагъэм ишIын пэIугъэхьэгъэным, нэмыкI гухэлъкIэ къызыфамыгъэфедэным банкым гъунэ лъифыщт. Ар зафэуи щыт», — къыIуагъ Александр Сидякиным.
Партиеу «Единэ Россием» ирегион политсовет хэтэу, партийнэ проектэу «Городская среда» зыфиIорэм Адыгэ РеспубликэмкIэ икоординаторэу, республикэ парламентым псэо­лъэшIынымкIэ, транспортымкIэ, связымкIэ, ЖКХ-мкIэ икомитет итхьаматэу Олег Картамышевым зэрэхигъэунэфыкIыгъэмкIэ, мы законыр амыгъэкощырэ мылъкумкIэ зэкъодзэн Iофхэм апылъхэм пэрыохъу афэхъущт.

«Урысыем и Президентэу Владимир Путиным мызэу, мы­тIоу къыIогъагъ N 214-р зытет законым ишапхъэхэм тате­кIы­жьын, нэмыкI хэгъэгухэм ащагъэфедэхэрэм татехьан зэрэфаер. Зимылъку псэолъэшIыным хэзылъхьэхэу Адыгеим ща­гъэпцIагъэхэм япчъагъэ бэ хъурэп, ау республикэм ихэбзэ Iэшъхьэ­тетхэм а Iофми гъунэ лъафы. Адыгеим и ЛIышъхьэу КъумпIыл Мурат зэрэхигъэу­нэфыкIыгъагъэу, агъэпцIэгъэ цIыф­хэм унэ зэращэфыщт ахъщэу ашIокIо­дыгъэр опсэуфэ ­аугъоигъ», — къыIуагъ Александр Си­дякиным.

Олег Картамышевым зэрэхигъэунэфыкIыгъэмкIэ, законыкIэм ишIуагъэкIэ зиIахь псэо­лъэшIыным хэзылъхьэхэрэм ямылъку ухъумагъэ хъущт, псэ­о­лъэшIыным фэгъэзагъэхэм хабзэм димыштэу зекIонхэ алъэкIыщтэп.