«Жъогъожъые къаргъохэр» мэшIэтых

Хьыкум приставхэм я Федеральнэ къулыкъу икъутамэу Адыгеим щыIэм и ГъэIорышIапIэ «Жъогъожъые къаргъохэр» («Хрустальные звездочки») зыфиIорэ фестиваль-зэнэкъокъум 2017-рэ илъэсым иапэрэ едзыгъо Мыекъуапэ щызэхищагъ.

Пщыныжь ягъэхьыгъэнымкIэ Фе­деральнэ къулыкъум Адыге­имкIэ и ГъэIорышIапIэ, МВД-м, хьыкум приставхэм я Федеральнэ къулыкъу икъутамэу Адыге­им щыIэм, нэмыкI структурэхэм ахэтхэм якIалэхэр фестивалым щызэIукIагъэх.

Музыкальнэ Iэмэ-псымэхэмкIэ мэкъамэхэр къырагъэIуагъэх, къэшъуагъэх, орэдхэр къаIуагъэх, усэхэм къяджагъэх. Зэхэща­кIо­хэм пшъэрылъ шъхьаIэу зыфа­шIыжьыгъэр къадэхъугъэу плъытэ хъущт. Зэнэкъокъур зезыща­гъэхэу Дзыбэ Саныетрэ Нэхэе Муратрэ зэрэхагъэунэфыкIыгъэу, кIэлэцIыкIухэмрэ ныбжьыкIэхэмрэ шIэжь яIэу пIугъэнхэмкIэ, лIэуж­хэм язэпхыныгъэхэр гъэпытэгъэн­хэмкIэ ащ фэдэ фестивальхэм ямэхьанэ зыкъеIэты.

АгукIэ къабзэхэу, дахэу фэпагъэхэу, мурадышIухэр яIэу кIэлэцIыкIухэр щыIэныгъэм игъогу техьэх. Апэрэ фестиваль-зэнэ­къокъухэм яшIэныгъэ, сэнаущыгъэу ахэлъыр ащауплъэкIу.

— Сигуапэу зэнэкъокъум сы-хэ­лэжьагъ, — къытиIуагъ Адыгэ Республикэм искусствэхэмкIэ икIэлэцIыкIу еджа­пIэу Лъэцэрыкъо Кимэ ыцIэ зыхьырэм зыщызыгъасэу Та­лъэкъо Джэнэт. — СикIэлэ­егъа­джэу Людмила Казаченкэр, си­Iахьылхэр зэхахьэм къэкIуа­гъэх.

Адыгэ шъуашэр щыгъэу Дж. Талъэкъом ижъырэ адыгэ орэдэу «Си Мурадинэр» дэгъоу къы­Iуагъ, Щытхъу тхылъыр фагъэшъо­шагъ.

КIэлэцIыкIу къэшъокIо ансамблэу «Абрекхэр» Къыблэ шъо­лъырым щызэлъашIэ. Купым хэтхэу Щыщэ Лаурэрэ Хьаткъо Расулрэ Адыгэ республикэ гимназием щеджэх. Лъэпкъ къашъор дахэу къагъэлъэгъуагъ, нэпэеплъ шIухьафтынхэр къафашIыгъэх. Р. Хьаткъомрэ Л. Щыщэмрэ къызэ­рэтаIуагъэу, лъэпкъ искусствэр ашIогъэшIэгъон. «Абрекхэм» яхудожественнэ пащэу ТхьакIумэщэ Налбек кIэлэцIыкIухэм алъэплъэ, яIэпэIэсэныгъэ зэрэхагъахъорэм егъэгушIо.

М. Марковыр зыхэлэжьэгъэ едзы­гъор шIэжьым фэгъэхьыгъ. Художественнэ Iофыгъохэр дэгъоу зэхэщагъэхэу къэлъэгъуагъэх. Бы­ракъыр дахэу пчэгум щагъэ­быбэ­тагъ. ДзэкIолI паIори къекIоу ща­гъэфедагъ. М. Марковым къы­Iогъэ лIыхъужъ орэдым уегъэ­гупшысэ.

Мыекъуапэ, районхэм якъэшъо­кIо купхэм зэнэкъокъур къагъэ­дэхагъ. Хьыкум приставхэм я Федеральнэ къулыкъу икъутамэу Адыгэ Республикэм щыIэм и ГъэIорышIапIэ ипащэ игуа­дзэу Дмитрий Лабазовыр фестивалым хэлэжьагъэхэм къафэ­гушIуагъ, хагъэунэфыкIырэ чIы­пIэхэр къыдэзыхыгъэхэм щытхъу тхылъхэр, кубокхэр, шIухьаф­тынхэр аритыжьыгъэх.

Орэд къэзыIуагъэхэм якуп аныбжьхэм ялъытыгъэу апэрэ чIыпIэхэр Ульяна Дзендзюокрэ Талъэкъо Джэнэтрэ къыдахыгъэх. Музыкальнэ Iэмэ-псымэхэмкIэ орэдышъохэр анахь дэгъоу зыгъэ­жъынчыгъэхэр Лъэцэр Тимур ыкIи Екатерина Простинар арых. Къэшъуа­кIо­хэм Велина Прокофьевар къа­хагъэ­щыгъ. Тэхъутэ­мы­­къое районым къи­кIыгъэ лъэпкъ къэ­шъо­кIо купэу «Кав­казым» шIу­хьаф­тын шъхьаIэу «Гран-при» зы­фиIорэр къыдихыгъ, пащэр Сихъу Мурат. Мые­къо­пэ пи­вэшI заводым шIухьафтыныр къаритыгъ.

Жюрим хэтыгъэ­хэу Исуп Аслъан, Дэхъу Аминэт, Ты­гъужъ Асыет, фэшъ­хьафхэм зэ­ралъы­тэрэмкIэ, кIэлэ­цIы­кIу­хэм яIэпэIэсэ­ны­гъэ хагъахъо, сэнэ­хьатэу къыхахыщтым емылъытыгъэу искусствэм пыщагъэх. Сценэшхом яшIэныгъэ икъоу къыщагъэлъэ­гъон амылъэкIырэми, шIэжьым гукIэ зэрэфэщагъэхэм мэхьэнэ ин ратыгъ.

Фестивалым икIэух зэнэ­къокъу Москва щыкIощт, Мыекъуапэ культурэмкIэ и Унэ зэнэкъокъур дэгъоу зэрэщызэхащагъэр тигуапэу къыхэтэгъэщы.