ЕшIэкIэшIур къызэдагъоты

«Зэкъошныгъ» Мыекъуапэ – «Урожай» Краснодар – 2:1.
Iоныгъом и 1-м Адыгэ республикэ стадионым щызэдешIагъэх.
Зезыщагъэхэр: А. Иванников – Ставрополь, П. Егоров, Р. Валеев – Ростов-на-Дону.
«Зэкъошныгъ»: Гиголаев (Ковалев, 72), Хьагъур, Катаев, Омаров, Замятин (Юрченко, 80), Белов, Ахмедханов, Делэкъу (Ещенко, 62), Къонэ (Шъхьэлахъо, 90), Бабенко, Крылов (Макеров, 90).
«Зэкъошныгъэм» иешIакIохэу къэлапчъэм Iэгуаор дэзыдзагъэхэр: Крылов – 41, Ахмедханов – 60.

«Урожаир» 1:0-у «Зэкъошныгъэм» къытекIозэ, тиешIакIохэр бэрэ апэкIэ илъыщтыгъэх. Денис Крыловыр благъэу зэкIугъэ къэлапчъэм лъэшэу дауи, хъагъэм Iэгуаор ридзагъ.

«Зэкъошныгъэм» ятIонэрэ ку­пым апэрэ чIыпIэр зэрэщиIыгъыр къыдэтлъытэзэ, текIоныгъэр къы­дихыщтэу тыгугъэщтыгъ. Метрэ 25-м къыщымыкIэу Ризван Ахмед­хановыр зыпэчыжьэ къэлапчъэм ошIэ-дэмышIэу зыдэом, Iэгуаор хъагъэм щычэрэгъугъ. Ащ фэдэу дахэу къэлапчъэм дадзэу ятIо­нэрэ купым бэрэ щытлъэгъурэп.

«Урожаир» пчъагъэу 2:1-м ымыгъэразэу тикъэлапчъэ бла­гъэу къекIущтыгъ. Давид Гиголаевыр пхъашэу банэзэ Iэгуаом зылъи­дзэу, кIуапIэ римытэу зэп къызэрэхэкIыгъэр. Шъобж хьылъэ ылъакъо къытыращи, ешIапIэм щызэблахъугъ. ЗэукIэгъур зыщаухыщт уахътэм Сергей Бабенкэмрэ Шъхьэлэхъо Амиррэ «Урожаим» икъэлэпчъэIутэу В. Шевченкэм екIугъэх. С. Шевченкэм хъагъэм Iэгуаор ридзэн игухэлъэу къэлапчъэм дэуагъ, ау В. Шевченкэм ар къызэкIидзэжьыгъ. Сергей изакъоу бэнагъэ, Iэгуаор зыми ритыгъэп шъхьае, къэлэпчъэIутыр нахь IэпэIасэу къычIэкIыгъ.

Адыгэ Республикэм и ЛIышъхьэу КъумпIыл Мурат, Урысыем и Къэралыгъо Думэ идепутатэу Хьасанэкъо Мурат, Адыгэ Респуб­ликэм физкультурэмкIэ ыкIи спортымкIэ и Комитет ипащэу Дэгужъые Мурат, Правительствэм, Парламентым якъулыкъушIэхэр ешIэгъум еплъыгъэх, спортым фэгъэхьыгъэ Iофыгъохэм атегущыIагъэх.

Пресс-зэIукIэр

«Урожаим» итренер шъхьаIэу Андрей Юдиным къызэриIуагъэмкIэ, командэр ылъэ теуцоным, нахь дэгъоу ешIэным фэхьазыр, кIэу аштэгъэ ешIакIохэм зыкъагъэшъыпкъэжьыщт.

«Зэкъошныгъэм» итренер шъхьа­Iэу Ешыгоо Сэфэрбый тиешIэкIо заулэмэ шъобж къатыращагъэу зэнэкъокъум зэрэхэмылажьэхэрэр, ащ пае къамыгъанэу текIоныгъэм командэм хэтхэр зэрэфэбанэхэрэр къыхигъэщыгъэх. «Зэкъошныгъэр» нахь шъуамбгъоу зэрешIэщтым, футболыр зышIогъэшIэгъонхэр зэригъэгушIощтхэм тапэкIи пы­лъыщт.

Iоныгъом и 8-м «Зэкъошны­гъэр» «Краснодар-3-м» Мыекъуа­пэ щыIукIэщт.