ЕджапIэм ищытхъу аIэты

Къыблэм дзюдомкIэ изэнэкъокъу Ермэлхьаблэ щыкIуагъ. Илъэс 21-м нэс зыныбжь кIалэхэр, пшъашъэхэр алырэгъум щыбэнагъэх.

Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм зыщызыгъэсэрэ ныбжьыкIэхэм медаль 11 зэнэкъокъум къыщыдахыгъ.

ЛIэхъусэжъ Адам, кг 66-рэ, Джарымэкъо Долэт, кг 73-рэ, Джумбер Липаридзе, кг 81-рэ, Анна Юшкова, кг 78-м къехъу, ­зэкIэми дышъэр Къыблэ шъолъырым къыщахьыгъ.

Даур Къасимэ, кг 90-рэ, тыжьыныр къыфагъэшъошагъ.

Джэрзыр бэнэкIуи 6-мэ къыдахыгъ. Лъэцэр Амир, кг 55-рэ, Мухамед Липаридзе, кг 60, Аулъэ Айдэмыркъан, кг 73-рэ, Бэгъ Аслъан, кг 81-рэ, Анна Лодневам, кг 63-рэ, Тулпэрэ Данэ, кг 78-м къехъу, ящэнэрэ чIыпIэхэр къахьыгъэх.

— БэнакIохэр зыгъэсэрэ тренерхэм шъуа­щыдгъэгъуазэ тшIоигъу, — къытиIуагъ ­Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыге­им дзюдомкIэ ихэшыпыкIыгъэ командэ итренер шъхьаIэу, республикэм изаслуженнэ тренерэу Бастэ Сэлым. — Шъынэхъо Мурат, Бэджыдэ Вячеслав, Хьакурынэ Дамир, Беданыкъо Рэмэзан, Беданыкъо Байзэт, Сергей Шутовым, КIубэ Хьамедэ, Мерэм Саидэ, Нэпсэу Бислъан, Ирина Власовам, Джарымэкъо Аслъан, Игорь Вержбицкэм, Роман Оробцовым, Адзынэ Алый яшIушIагъэ осэ ин фэтэшIы. Тренерхэм гуетыныгъэ ахэлъэу Iоф ашIэ, Мыекъопэ бэнэпIэ еджапIэм ишэн-хабзэхэр къэIэтыжьыгъэнхэм, ныб­жьыкIэхэр спортым имызакъоу, щыIэныгъэм фэгъэсэгъэнхэм пылъых. ТиеджапIэ бэнэкIо цIэрыIоу щапIугъэхэм щысэ атетэхы, Адыгэ Республикэм ищытхъу дунаим щаIэты.

Ермэлхьаблэ щыкIогъэ зэнэкъокъум бэ­нэкIо 250-м нахьыбэ хэлэжьагъ. Ростов, Волгоград хэкухэм, Краснодар краим, Къырым, Къалмыкъым, Адыгеим яспортсмен-
хэр алырэгъум щызэIукIагъэх. ХагъэунэфыкIырэ чIыпIэхэр къыдэзыхыгъэхэр Урысыем икIэух зэнэкъокъоу шэкIогъум и 14-м Красноярскэ къыщызэIуахыщтым хэлэжьэщтых.