Дышъэр япшIэнэрэу къыхьыгъ

Урысыем дзюдомкIэ изэнэкъокъу къалэу Зеленоград щыкIуагъ. МакIэу зэхэзыхыхэрэр зэIукIэгъухэм ахэлэжьагъэх.

Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм зыщызыгъэсэрэ Беданэкъо Заур килограмм 81-м нэс къэзыщэчыхэрэм якуп щыбэнагъ.

ИкъулайныгъэкIи, сэнаущыгъэу хэлъымкIи адыгэ батырыр къахэщыгъ. ЗэкIэ ибэнэгъухэр къыхьыхи, дышъэр къыфагъэшъошагъ.

Беданэкъо Заур спортышхом щыцIэрыIу. МакIэу зэхэзыхыхэрэм я Олимпиадэ джэгунхэу Болгарием щыкIуагъэм апэрэ чIыпIэр къыщыдихыгъ. Урысыем дзюдомкIэ изэнэ­къокъу гъогогъуи 10 дышъэр къыщихьыгъ. Нарт шъаор спорт унагъом щапIугъ.

Заур ятэу Беданэкъо Байзэт Урысыем изаслуженнэ тренер, ятэшэу Рэмэзанэ СССР-м дзюдомкIэ апэрэ чIыпIэр къыщихьыгъ, Адыгэ Республикэм изаслуженнэ тренер. З. Беданэкъом итренерыр ят, ятэшыри икIэлэегъаджэу елъытэ.

З. Беданэкъом Звенигород щыриIэгъэ зэIукIэгъум плIыри «къабзэу» къыщихьыгъ. Тюмень, Санкт-Петербург къарыкIыгъэхэм атекIуагъ. КIэух зэIукIэгъур Москва ибэ­накIо къышIуихьыгъ.

— Хэгъэгум дышъэ медалыр япшIэнэрэу къызэрэщысхьыгъэм фэшI тренерхэм, спорт еджапIэм ипащэу КIуае Хьазрэт, ныбджэгъухэу IэпыIэгъу къысфэхъухэрэм лъэшэу сафэраз, гъэзетымкIи «тхьашъуегъэпсэу» ясIожьы сшIоигъу, — къытиIуагъ Беданэкъо Заур.

Европэм дзюдомкIэ изэнэкъокъу чъэпыогъу мазэм Бельгием щыкIощт. З. Беданэкъом зэIукIэгъухэм ишъыпкъэу зафегъэхьазыры.

Сурэтым итхэр: Беданэкъохэу Байзэт ыкIи Заур.