«Дачэ амнистиер»

Дачэ зиIэхэм апае амнистиер къызаугупшысыгъагъэр «перестройкэм» илъэхъан. Хабзэм цIыфхэм къаритырэ чIыгур яунае зэрэхъунэу, шIэгъэн фэе Iофыгъохэр зэрыт хабзэ аштэгъагъ. Ащыгъум чIыгум кадастровэ паспорт пымылъми ар зэрэуер къэзыушыхьатырэ свидетельствэ къыуатыщтыгъ. Унэри, ащ джыри учIэмыхьажьыгъэми, къыптыратхэщтыгъ.

Хабзэр зэрэгугъэгъагъэр сотки 6 хъурэ чIыгу Iахьхэр хабзэу щыIэхэм адиштэу нахь псынкIэу арагъэтхынхэу ары, ау Iофыр кIэкIыгъэп.

Ащ къыхэкIэу, 2006-рэ илъэсым къыщегъэжьагъэу пIалъэр щэ лъагъэкIотагъ, 2010-рэ, 2015-рэ, 2018-рэ илъэсхэм регистрациехэр арагъэшIынхэу фэягъэх.

Къалэм дэдзыгъэу чIыгу унае ыкIи ащ тыришIыхьагъэу унэ зиIэхэм ахэр регистрацие арагъэшIынхэм пае аужырэ пIалъэу афагъэуцугъагъэр 2018-рэ илъэсым игъэтхапэ иапэрэ мафэ нэс. Iофыр зэрагъэпсынкIэнэу игъом зитхылъхэр зымыгъэпсыхэрэм охътабэ тырагъэкIуадэзэ нахь шIыкIэ къинкIэ зэшIуахынхэу къараIогъагъ. Кадастровэ ведомствэхэри гъэтхапэм къыщегъэжьагъэу тхылъ гъэпсынхэр цIыфхэм афагъэхьылъэнхэу ежэщтыгъэх, ау ар кIыхьэлыхьэ хъугъэ.

«Дачнэ амнистиер» гъэцэкIагъэ зэрэхъугъэм Федерациехэм я Совет мэзаем ыкIэм хэплъагъ, Къэралыгъо Думэм джыри зэ амнистиер зэкIихьагъ. Илъэс 12 хъугъэу афэмыгъэпсыхэрэ тхылъхэр 2020-рэ илъэсым игъэтхапэ нэс джыри лъагъэкIотагъ.

ШЪАУКЪО Аслъангуащ.