Гъэстыныпхъэ шхъуантIэр аIэкIагъахьэ

Агуй-Шапсыгъэ шIэхэу иIэ хъущт экологическэу къэбзэ гъэстыныпхъэ шхъуантIэр.

Къоджэ псэупIэхэм гъэстыныпхъэ шхъуантIэр алъыгъэIэсыгъэнымкIэ программэм игъэцэкIэн епхыгъэу газрыкIуапIэм икъудыин ТIопсэ районым щылъагъэкIуатэ.

Муниципалитетым иадминистрацие къызэрэщаIуагъэмкIэ, мы къуаджэм иурамхэу Зэкъошныгъэм, Шапсыгъэм ыкIи Мирым километритIу фэдиз зикIы­хьэгъэ газрыкIуапIэр анэсыщт. ЗэкIэмкIи къуаджэм газрыкIопIэ километрэ 21-рэу участки 7-у зэтеутыгъэр щагъэпсыщт. Участкищым IофшIэнхэр ащаухыгъэх.

Гъэстыныпхъэ шхъуантIэр Агуй-Шап­сыгъэ IэкIэгъэхьэгъэнымкIэ проектым игъэцэкIэн 2017-рэ илъэсыр ары зы­фежьагъэхэр, ащ иапэрэ чэзыу мы илъэсым ыкIэхэм адэжь аухынэу ра­хъухьэ. ХыIушъо Шапсыгъэ ианахь къоджэшхор – мыщ нэбгырэ мини 3 фэдиз дэс – адыгэхэр бэу зыщыпсэурэ яплIэнэрэ къуаджэу гъэстыныпхъэ шхъуантIэр зыIэкIэхьагъэу хъущт. Ащ ыпэкIэ, илъэси 10 фэдизкIэ узэкIэIэ­бэжьмэ, гъэстыныпхъэ шхъуантIэр ара­щэлIэгъагъ Шъачэ епхыгъэ къуаджэхэу ШэхэкIэишхом, ШэхэкIэй ЦIыкIум ыкIи Ахъынтам.

Ныбэ Анзор.