Гъунапкъэм блэкIыныр игухэлъ

Адыгэ къэралыгъо университетым физкультурэмрэ дзюдомрэкIэ и Институт ия 5-рэ курс щеджэрэ Виталий Диденкэм гъатхэм чэщ-мэфищым мычъыеу километрэ 500-м ехъу ычъынэу зегъэхьазыры.

Илъэс 14-кIэ узэкIэIэбэжьмэ Америкэм щыщ Дин Карнасис гъэхъэгъэ гъунапкъэу ыгъэуцугъэм блэкIын гухэлъ ышIыгъ.

— ИлъэсищыкIэ узэкIэIэ­бэжьмэ, Кисловодскэ щыкIогъэ зэнэкъокъум щызэхэсхыгъ 2005-рэ илъэсым Дин Карнасис гъэ­хъэгъэ гъунапкъэ зэригъэуцугъэр. Ащ икъэгъэлъэгъон сы­шъхьарыкIын пшъэрылъ зы­фэзгъэуцужьыгъ. Дин мычъыеу сыхьат 81-м фэдизкIэ километрэ 560-рэ ычъыгъ. Сэ чэщ-мэфищыкIэ ар къэсчъынэу зысэгъэхьазыры. ТекIоныгъэ къызыдэсхыкIэ, Урысыем гъэхъэгъэ гъунапкъэр ыгъэуцугъэу язгъэтхыщт. Ащ пае сыкъызэрэчъэрэр видеокIэ тесхыщт ыкIи тхьапэхэр згъэхьазырыщтых, — къыIуагъ спортсменым.

1996-рэ илъэсым станицэу Джаджэм Виталий Диденкэр къыщыхъугъ. 2011-рэ илъэсым къыщегъэжьагъэу атлетикэ псынкIэм пылъ. Адыгеим ыкIи Пшызэ шъолъыр мы спортымкIэ чемпион хъугъэ.

Илъэсищ фэдиз хъугъэ Диденкэм мы Iофтхьабзэм зы­зыфигъэхьазырырэр. 2016-рэ илъэсым марафонэу кIуагъэм хэлэжьагъ, чэщ зымафэкIэ километрэ 200 къычъыгъ. Илъэс тешIагъэу триатлонымкIэ анахь зэнэкъокъу къинхэм ащыщэу IRONMAN хэлэжьагъ. Сыхьат 12-м къыкIоцI ащ хэлэжьагъэхэр километри 4 есыгъэх, кушъхьэфачъэкIэ километри 180-рэ акIугъ ыкIи километрэ 42-рэ ачъыгъ.

— Гъэтхапэм ыкIэм, мэлылъфэгъум икъежьапIэм марафоныр редгъэкIокIынэу тэгъэ­нафэ. Зэшъхьэзэшъо чIыпIэм сыщычъэщт. Iофтхьабзэр систаницэ гупсэу Джаджэм щысыухыщт. Сыкъызэрэчъэрэр кушъхьэфачъэм тесэу синыбджэгъу видеокIэ тырихыщт, — къыхигъэхъуагъ спортсменым.

Адыгэ къэралыгъо универ­ситетым ипресс-къулыкъу къы­зэри­тырэмкIэ, Виталий къызэ­рэчъэ­рэр инстаграмымкIэ (import555) эфир занкIэм къыщагъэлъэгъощт.
(Тикорр.).