ГъашIэр зэхахьэм щэпытэ

ШIэжьым лIэужхэр зэрепхых, гукъэкIыжьхэр нэгум къыкIегъэуцох. Мыекъуапэ ия 131-рэ мотошхончэо бригадэ 1995-рэ илъэсым щылэ мазэм иапэрэ чэщ тхьамыкIагъоу Чэчэным къыщехъулIагъэр тарихъым хэкIокIэщтэп.

2005-рэ илъэсым къыщыу­благъэу бригадэм ишIэжь Мафэ щылэ мазэм и 2-м Адыгэ Рес­публикэм щыхагъэунэфыкIы.

Хабзэм икъулыкъушIэхэр, общественнэ движениехэм ялIыкIохэр, Мыекъуапэ дзэ къулыкъур щызыхьыхэрэр, ны-тыхэр, зэо зэфэшъхьафхэм ащыфэхыгъэхэм яныб­джэгъухэр, Iахьылхэр, кIэлэ­еджа­кIохэр, нэмыкIхэри зэха­хьэм хэлажьэх. Ахэр шIэжьым зэ­фищагъэх.

АцIэхэр къыщыраIуагъэх

ЧIыпIэ «плъырхэм», зэо зэ­фэшъхьафхэм ащыфэхыгъэхэм ясаугъэт зэхэтхэу Мые­къуапэ икъыблэ дэхьапIэ ща­гъэуцугъэхэм апашъхьэ щы­кIо­гъэ зэхахьэм зыми ыгу щы­рэхьатыгъэп. Бригадэм идзэ­кIолIхэу Чэчэным щыфэхыгъэ­хэм ацIэхэр шIэжь зэIукIэгъум къыщыраIуагъэх, зы такъикъэ афэшъыгъуагъэх. Урысыемрэ Адыгэ Республикэмрэ якъэралыгъо быракъхэр дзэкIолIхэм пчэгум къырахьагъэх. Ащ фэдэ уахътэм нэплъэгъум къе­бгъэубыты пшIоигъор макIэп.

Зыоппъыхьэ, гур мэлъыхъо. Заом имашIо зынэсыгъэхэм къатегущыIэхэрэм уядэIузэ, шIэжьым зеушъомбгъу…

Тщыгъупшэхэрэп

Адыгэ Республикэм и Парламент и Тхьаматэу Владимир Нарожнэм ти ЛIышъхьэу КъумпIыл Мурат ыцIэкIэ зэхахьэм къекIолIагъэхэм закъыфигъэ­загъ. Чэчэным щыкIогъэ заом Мыекъуапэ ибригадэ идзэ­кIолI-
хэу щыфэхыгъэхэм лъытэныгъэ ин непи зэрафэтшIырэр В. Нарожнэм къыIуагъ

— ДзэкIолIхэр ныбжьыкIа­гъэх, щыIэныгъэр лъагъэкIотэным зыфагъэхьазырыщтыгъ. Унагъо ашIэнэу мурадхэр яIагъэх, — къыIуагъ Владимир Нарожнэм. — Хэгъэгум изыкIыныгъэ гъэпытэгъэным, мамыр псэукIэр нахьышIу шIы­гъэным ахэр фэбэнагъэх.

Мыекъуапэ иадминистрацие ипащэ игуадзэу Юрий Томчак къызэгущыIэм анахьэу хигъэ­унэфыкIыгъэр ныбжьыкIэхэр яхэгъэгу фэшъыпкъэхэу пIу­гъэнхэм имэхьанэ зыкъызэри­Iэтырэр ары.

Гум иуз тигъэрэхьатырэп

Къэралыгъо 20-м къехъумэ ащыфэхыгъэхэ дзэкIолIхэм ясаугъэтхэр къызыщызэ­Iуахыгъэ пчэгум генерал-лей­тенантэу Константин Пуликовскэр къырыкIо зыхъукIэ, лъэ­бэкъоу ыдзырэ пэпчъ игукъэ­кIыжьхэр рипхыхэу къытщэхъу.

Пкъыр ищыгъ, ынэхэм уяплъы­зэ гущыIэгъу уфэхъумэ, псэ зыпыт къэбархэр жъы зэрэмыхъухэрэм унаIэ теодзэ. Константин Пуликовскэм ыкъоу Алексей капитанэу щытыгъ. ЩыIэныгъэр шIу ылъэ­гъущтыгъ, гукIэгъу зыхэлъ цIыф шIагъоу иныбджэгъухэм алъы­тэщтыгъ, ЛIыхъужъныгъэм иорден къызыфагъэшъошэгъэ капитанэу А. Пуликовскэм ыгу къытеожьырэп.

— Уахътэм уIагъэхэр ыгъэ­хъужьхэу цIыфхэм къаIоу зэхэтэхы, ащ сэ еплъы­кIэу фысиIэр нэмыкI. Мыщ фэдэ зэха­хьэхэу псэ зыпытхэр, цIы­фыбэ зыщызэIукIэхэрэр арых Iэзэгъу къытфэхъухэрэр, — къы­Iуагъ Константин Пуликовскэм.

Гупшысэ зэIухыгъэм чыжьэу уегъаплъэ, щыIэныгъэм ихъу­гъэ-шIагъэхэр нахь куоу зэбгъа­шIэхэ пшIоигъо охъу.

— Мыжъобгъум тетхэгъэхэ лъэкъуацIэхэм укъяджэзэ, о узылъыхъурэр къахэогъэщы,

— игупшысэхэр лъегъэкIуатэх Константин Пуликовскэм. — ЛъэкъуацIэу пхьырэр зыплъэ­гъукIэ, укъеджэныр къыохьы­лъэкIы…

… Ары, къыппэблэгъэ цIыфым ыгу къызэрэтемыожьырэр ошIэми, ухэщэтыкIы, шIэ­жьым пкIантIэу къыптырикIэрэм кIочIаджэ уешIы, гущыIэ шъабэкIэ зыгорэхэр епIо пшIоигъоу охъу.

ДзэкIолIхэр къырыкIуагъэх

Зэхахьэм хэлажьэхэрэм Егъэ­шIэрэ машIор зыщыблэрэ саугъэтым къэгъагъэхэр кIэ­ралъхьагъэх. Фэхыгъэ дзэ­кIолI­хэм шъхьащэ афашIыгъ. Мые­къопэ гарнизоным идзэ­кIолIхэр зэхэтхэу пчэгум къыры­кIуагъэх.

ЛIэужхэм язэпхыныгъэхэр

Урысыем идзэ-патриот об­щественнэ движениеу «Юнармием» икъутамэу Адыгэ Рес­публикэм щызэхащагъэм хэтхэр шъуашэхэр ащыгъхэу шIэжь зэхахьэм щытлъэгъугъэх. Мые­къопэ районым къикIыгъэхэм гущыIэгъу тафэхъугъ. Полина Мухинар, Дарья Буцоевар, Ди­а­на Стереховар, нэмыкIхэр та­рихъыр нахьышIоу зэрагъэшIэным пылъых. ЛIыхъужъныгъэм ехьылIэгъэхэ зэIукIэгъухэм мэхьэнэ ин араты.

Урысыем и ЛIыхъужъэу Евгений Осокиныр зэрэныбжьыкIэу тынэгу кIэт. ТызэIукIэмэ сэлам зэтымыхэу къыхэкIыщтыгъэп. Евгений ятэу Анатолий осокиным Мыекъопэ гарнизоным илъэсыбэрэ къулыкъур щихьыгъ, полковник хъугъэу дзэм хэтыгъ. Генералэу Юрий Щипинымрэ Анатолий Осокинымрэ язэдэгущыIэгъу уебгъу­кIон плъэкIынэу щытыгъэп.

Мыжъобгъоу щытым тетха­гъэм ахэр икIэрыкIэу еджэх… ГущыIэу къаIощтыр ерагъэу къагъоты. Урысыем и ЛIы­хъужъэу Евгений Осокиным исурэт мыжъобгъум тешIыхьагъ. Офицер ныбжьыкIэм къулыкъур Чэчэным щихьызэ заом имашIо зыхэфэм, къызэкIэкIуагъэп. ЛIыгъэ шъыпкъэ зэрихьагъ, иныбджэгъу къыгъэнэжьызэ хьы­лъэу къауIагъ. Лъыр зэпымыоу зэрэчIинэрэр зыдишIэ­жьызэ, ыгу къытеофэ игъусэ дзэкIолIхэм афэгумэкIыгъ.

Мыжъом тешIыхьэгъэ сурэтыр макъэ пыIукIэу къэмыгущыIэми, уеплъы зыхъукIэ, гупшысэхэм узэлъакIу…

Адыгэ Республикэм лъэпкъ IофхэмкIэ, IэкIыб къэралхэм ащы­­псэурэ тилъэпкъэгъухэм ады­ряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр урысхэм, къэндзалхэм, къэзэкъхэм, адыгэхэм, нэмыкI­хэм яобщественнэ движениехэм ахэтхэм аIукIагъ. ­ЯзэдэгущыIэгъу къыщыхагъэщыгъэр псэ зы­пыт зэIукIэгъухэм лъэпкъхэм языкIыныгъэ зэращыпытэрэр ары.

ШIэжьым ищысэхэмкIэ ныбжьыкIэхэр апIух, хэгъэгум икъэ­ухъумэн фагъасэх.

ЕмтIылъ Нурбый.
Сурэтхэр зэхахьэм къыщытетхыгъэх.