ГуфакIохэм ялIыхъужъныгъэ тэгъэлъапIэ

Грузием иуIэшыгъэ кIуачIэхэр заокIэ Абхъазым ичIыгу зихьагъэхэр тыгъуасэ илъэс 26-рэ хъугъэ. Ащ фэгъэхьыгъэ зэхахьэ Мыекъуапэ щыкIуагъ.

Щытхъур зыфаIорэ дзэкIолIым ипсынэкIэчъ щызэIукIагъэх хабзэм икъулыкъушIэхэр, Абхъазым ишъхьафитныгъэ фэбэнагъэхэр, ны-тыхэр, общественнэ движениехэм ялIыкIохэр, нэ­мыкI­хэри. Адыгэ Республикэм и ЛIышъхьэ ыкIи Адыгэ Респуб­ликэм иминистрэхэм я Кабинет я Администрацие ипащэ игуа­дзэу МэщлIэкъо Хьамидэ рес­публикэм ипащэхэм ацIэкIэ зэхахьэм къыщыгущыIагъ.

Адыгеим икIыгъэ кIалэхэр Абхъазым лIыхъужъэу фэбэнагъэхэу Хь. МэщлIэкъом къы­Iуагъ. Мамыр псэукIэр зыпкъ рагъэуцожьыным, Абхъазымрэ Адыгеимрэ язэпхыныгъэхэр гъэпытэгъэнхэм апсэ емыблэжьхэу фэзэуагъэх.

Мыекъуапэ иадминистрацие ипащэ иапэрэ гуадзэу Юрий Томчак, Мыекъуапэ инароднэ депутатхэм я Совет итхьаматэу Джарымэкъо Азмэт, Адыгэ Рес­публикэм икIыгъэ гуфакIохэм я Совет итхьаматэ игуадзэу Къу­ижъ Къэплъан зэхахьэм къыщы­гущыIагъэх. Адыгеим игуфа­кIохэр заом иапэрэ мафэхэм къош Абхъазым зэрэкъоуцуа­гъэхэм ишIуагъэкIэ Грузием идзэхэм пхъашэу апэуцужьы­гъэх, рес­публикэр шъхьафит ашIыжьыгъ.

Адыгеим игуфэкIо 200 фэдиз заом хэлэжьагъ. ЛIыхъужъэу фэхыгъэхэм ацIэхэр зэхахьэм къыщыраIуагъэх, зы такъикъэ афэшъыгъуагъэх.
Республикэм щыщ кIалэхэу Абхъазым щыфэхыгъэхэм саугъэтэу афагъэуцугъэм къэгъагъэхэр кIэлъыралъхьагъэх. Уры­сыем, Абхъазым, Адыгеим якъэралыгъо быракъхэр лIы­хъужъхэм ацIэкIэ щаIэтыгъэх.

Зэшъхьэгъусэхэу Валерий ыкIи Галина Диколенкэхэм акъоу Сергей Абхъазым щы­фэхыгъ. Саугъэтым къэгъагъэ­хэр кIэлъыралъхьэзэ нэпсэу къяхырэм гур ыгъэцIыкIущтыгъ. Саугъэтым гуфакIохэм ацIэхэр тетхагъэх: А. Хъуадэ, М. Шэ­у­джэн, А. Мыкъо, Р. Хьабэхъу, А. Хьаткъо, С. Крынин, Р. Бар­цо, С. Диколенко, К. Нехай.

ГуфакIохэм лIыхъужъныгъэу зэрахьагъэр Абхъазым щагъэлъапIэ. А. Хъуадэм ыцIэ еджапIэм фаусыгъ. ТигуфакIохэм ацIэ­кIэ къалэхэм яурамхэм яджагъэх. Адыгэ Республикэми тигуфэкIо лIыхъужъхэр щашIэх. Спорт зэнэкъокъухэр, зэIукIэгъухэр афызэхащэх.

ЕмтIылъ Нурбый.