Гум къыщежьэрэр къыотэжьы

Италием икъалэу Феррара косметологэу щеджэрэ ЛIыхъурэе Джэнэт гущыIэгъу тызыфэхъум, зэгъэпшэнхэр тшIыгъэх. Сэнэхьатэу къыхэпхыщтымрэ лъэпкъ шэн-хабзэхэмрэ язэпхыныгъэхэр нахь къыхэдгъэщыгъэх.

— Адыгэ республикэ гимназиер къызысэухым, сянэрэ сэрырэ тызэдегупшыси, Италием еджакIо сыкIонэу унашъо сшIыгъэ, — къеIуатэ ЛIыхъурэе Джэнэт. — Мыекъуапэ сыкъыщыхъугъ, Аскъэлае сыщыщ.

— Уятэ Аскъэлае щапIугъа?

— Ары. Адыгабзэр унагъом щызэзгъэшIагъ. Адыгэ къашъом сыфэзыгъэсагъэр Гъонэжьыкъо Ирин. Сшыпхъу нахьыжъэу Рузанэ загъорэ къызэрэсиIоу, уфаемэ, адыгабзэри, лъэпкъ къашъори псынкIэу зэбгъэшIэщтых.

— Италием щыбгъэфедэрэ бзэр къытэпIуагъэп.

— Бзэ лые щыIэп. Инджылызыбзэр Мыекъуапэ зэрэщыскIугъэм апэрэ уахътэм ишIуагъэ къысэкIыжьыгъ. КIэлэегъаджэхэр французыбзэкIи мэгущыIэх. Итальяныбзэр ары тызэреджэрэр.

— Урысыбзэ щызэхэпхырэба?

— Сызыдеджэрэ купыр нэбгырэ 25-рэ мэхъу. Урысыем щыщыр сэры ныIэп. Сатыум пылъхэм уахахьэмэ, урысыбзэр зэхэпхыщт, ау ахэр тэ къытпэчыжьэх.

— Адыгэ Республикэм узэрэщыщыр студентхэм ашIэрэба?

— Лъэпкъ шъуашэр сщыгъэу адыгэ къашъохэр къафэсэшIых. Фортепианэм зыфэзгъэсагъэшъ, адыгэ орэдэу «Синанэр», нэмыкIхэри къесэгъаIох. СиIахьылхэм телефонкIэ сикъэбархэр къафэсэIуатэх.

— Джэнэт, цIэ гъэшIэгъон къыпфаусыгъэр, сэнэхьатэу къыхэпхыгъэри къызэрыкIоп.

— ЦIыфым сыдигъуи дахэу зыкъигъэлъагъо шIоигъу. Косметологым пэблэгъэ сэнэхьатхэри зэсэгъашIэх. Шъхьацыр зэкIужьэу зэгъэфагъэу, нэгур къабзэу зэIухыгъэу цIыфыр псэунэу фаемэ IэпыIэгъу уфэхъуныр дэгъуба?

— Дэгъу, ау цIыфыр ыгукIи, итеплъэкIи къэбзэным студентхэр, кIэлэегъаджэхэр тегущыIэхэрэба?

— Егъэджэн сыхьатхэм ащ фэдэ Iофыгъохэр къащытэIэтых. Философие зыхэлъ гупшысэхэр сыдигъокIи тшIогъэшIэгъоных. Сэнэхьатэу къыхэсхыгъэр щыIэныгъэм ищыкIагъ. Косметологым псауныгъэм игъэпытэн епхыгъэ Iофхэри егъэцакIэх. УишIэныгъэ зэрэхэбгъэхъощтым мафэ къэс упылъын фаеу тикIэлэегъаджэхэм къытаIо.

— Джэнэт, шэмбэт пчэдыжьым Италием бгъэзэжьыщтэу къысэпIуагъ. Сыда угу ихъыкIырэр?

— Италиер къэралыгъо гъэшIэгъон. Музейхэр, зыгъэпсэфыпIэ паркхэр дахэх, пIуныгъэм фэгъэхьыгъэх. Арэу щытми, Адыгеим ичIыопс, тилъэпкъ къашъохэм, цIыф шIагъоу тиIэхэм уямызэщэу уакъытегущыIэн плъэкIыщт. Адыгэ джэгухэу Мыекъуапэ, Налщык ащыкIуагъэхэм сахэлэжьагъ.

— Дахэу уащыуджэу услъэгъугъ.

Джэнэт мэщхы, нэплъэгъу шъабэкIэ зыкъысфегъазэ, телефоныр къештэшъ, нэгушIоу адыгэ джэгухэм гукIэ зафегъэзэжьы. Ипшъэшъэгъоу Мырзэ Суандэ, джэгухэм язэхэщакIоу КъумпIыл ТIахьир, нэмыкIхэм къатегущыIэ.

— Италием джыри илъэситIо сыщеджэщт, — зэдэгущыIэгъур лъегъэкIуатэ ЛIыхъурэе Джэнэт. — Сыгу къео адыгэ шъуашэм и Мафэ, Адыгэ Республикэм имэфэкIхэм сахэлэжьэн зэрэсымылъэкIыщтыр. Ныбджэгъоу, нэIуасэу сиIэхэм къахэхъуагъэу Италием зэрэзгъэзэжьырэм сегъэгушIо.

— Уимурад къыбдэхъунэу пфэсэIо.

— Тхьауегъэпсэу.

Сурэтым итыр: ЛIыхъурэе Джэнэт адыгэ джэгум хэлажьэ.

ЕМТIЫЛЪ Нурбый.