Батырым иджэрз

Дунаим атлетикэ онтэгъумкIэ изэнэкъокъу Ашхабад щыкIуагъ. Адыгэ Республикэм ибатырэу Родион Бочковыр Урысыем ихэшыпыкIыгъэ командэ хэтэу зэIукIэгъухэм ахэлэжьагъ.

Къэралыгъо 75-мэ яспорт­смен 604-рэ щылычым ебэныгъ. Тэхъутэмыкъое районым щапIугъэ Родион Бочковыр килограмми 109-рэ къэзыщэ­чыхэрэм якуп хэтэу дунаим ибатырхэм янэкъокъугъ. «Рывок» зыфиIорэмкIэ кг 190-рэ къыIэти, Р. Бочковым джэрз медалыр къыфагъэшъошагъ.

Адыгэ Республикэм атлетикэ онтэгъумкIэ испорт еджапIэ итренерэу, спортымкIэ дунэе класс зиIэ мастерэу Роман Казаковым Р. Бочковыр егъасэ.


Адыгэ Республикэм и ЛIы­шъхьэу КъумпIыл Мурат тиспорт­смен цIэрыIоу Родион Бочковым, ащ итренерэу Роман Ка­заковым шIуфэс тхылъ афигъэхьыгъ, республикэм ищытхъу спортышхом тапэкIи щылъа­гъэкIотэнэу афиIуагъ.

ЕмтIылъ Нурбый.
.