Батырхэм ялъэгапIэхэр

Урысыем и Къыблэ атлетикэ онтэгъумкIэ изэнэ­къокъу къалэу Анапэ пэгъунэгъу псэупIэу ШIукъо щыкIуагъ. 1996-рэ илъэсым ыкIи ащ ыуж къэхъугъэ кIалэхэр щылычым ебэнхэзэ, кIуачIэмрэ къулайны­гъэмрэ зэрапсыхьэрэр къагъэлъэгъуагъ.

Адыгэ Республикэм ­атлетикэ онтэгъумкIэ икIэлэцIыкIу-ныб­жьы­кIэ спорт еджапIэ ипащэу Сихъу Рэмэзанэ тызэрэщигъэгъозагъэу, тибатырхэм гъэхъагъэхэр ашIы­гъэх, апэрэ чIыпIэхэр нарт шъэуи­тIумэ къыдахыгъ.

Хъыщт Хьазрэтбый, килограмм 56-м нэс къэзыщэчырэмэ якуп, апэрэ чIыпIэр къыфагъэшъошагъ. Гъыщ Зураби мы купым ­хэтыгъ, ащ я 3-рэ чIыпIэр къыдихыгъ. Бе­данэкъо Тимур, кг 62-рэ, апэрэ чIыпIэр къыхьыгъ. Выкъэ Рэмэ­зан, кг 69-рэ, дышъэкI Налбый, кг 94-рэ, ящэнэрэ чIыпIэхэр къы­дахыгъэх. Шъэожъ Алый, кг 105-рэ, Бэгъушъэ Руслъан, кг 69-рэ, яплIэнэрэ хъугъэх, Шхонч­бэшIэ Руслъан, кг 85-рэ, я 5-рэ чIыпIэр къыдихыгъ.

Краснодар краим ихэшыпы­кIы­гъэ командэ зэкIэми апэ ишъыгъ, Адыгэ Республикэм икомандэ ятIонэрэ чIыпIэр къыдихыгъ, Ростов хэкур ящэнэрэ хъугъэ.

РСФСР-м изаслуженнэ трене­рэу Хъуажъ Мэджыд, тренер-кIэлэегъаджэхэу Выкъэ Рэщыд, Чэмбэхъу Анзор, Сихъу Къэплъан медальхэр къыдэзыхыгъэ батырхэм япащэх.

ЗыцIэ къетIогъэ ныбжьыкIэхэм ащыщхэр гурыт еджапIэхэм якIэ­лэеджакIох. Адыгэ къэралыгъо университетым и Мыекъопэ къэралыгъо гуманитар техническэ колледж спортсмен макIэп ще­джэ­рэр. Директорэу КIэрэщэ Андзаур зэхэщэн IофыгъохэмкIэ тре­нер-кIэлэегъаджэхэм гъусэны­гъэ адыриI. ЗэгурыIоныгъэу ахэ­лъым ишIуагъэкIэ, атлетикэ онтэгъумкIэ, нэмыкI спорт лъэпкъ­хэмкIэ студентхэм медальхэр зэ­нэкъо­къу­хэм къащахьых, ­Адыгэ Республикэм ыцIэ спортышхом щаIэты.