АшIэным, ащымыгъупшэным фэшI

ТIопсэ районым ицIыф цIэрыIохэр ашIэнхэмкIэ ыкIи яшIэжь гъэлъэпIэгъэнымкIэ общественнэ-просветительскэ проектыр районым щыгъэцэкIэгъэныр лъагъэкIуатэ.

Депутатхэм ярайон Совет бэмышIэу унашъо ышIыгъ джыри еджэпIитIумэ ахэм афэдэ цIыфхэм ацIэхэр афэу­сыгъэнхэу. Арэущтэу селоу Мессажай дэт еджапIэу N 22-м Советскэ Союзым и ЛIыхъужъэу, ТIуапсэ, Одессэ, Сева­стополь къэзыу­хъумагъэхэм, Румыниер, Югославиер, Венгриер, Чехословакиер, Австриер шъхьафит шIыжьыгъэнхэм ахэлэжьэгъэ Павел Державиным ыцIэ фаусыгъ.

ПсэупIэу Тюменскэм дэт гурыт еджапIэу N 37-м Советскэ Союзым и ЛIыхъужъэу, ТIуапсэ икъэухъумэнкIэ лIыблэнагъэ зэрэзэрихьагъэм фэшI а щытхъуцIэ лъапIэр къызфагъэшъошагъэу Леонтий Кондратьевым ыцIэ ыхьыщт. Гъэсэныгъэм иучреждениеу къуаджэу Псыбэ дэтым мыщ щыщыгъэ ордензехьэу Шъхьэлэхъо Ахьмэд ыцIэ фаусыгъ. Район администрацием къызэрэщыт­фаIота­гъэмкIэ, ТIопсэ районым ыкIи икъоджэ гупсэ хэхъоныгъэ ашIыным зищыIэныгъэ фэзыгъэлэжьэгъэ Шъхьэлэхъо Ахьмэд ыцIэ мы еджапIэм фаусыным илъэс пчъагъэ хъугъэу ыуж итыгъэх. Ахьмэд Хэгъэгу зэошхом ыкIи ЛэжьэкIо Быракъ Плъыжьым яорденхэр, Кавказ къэу­хъумэгъэным зэрэхэлэжьагъэм фэшI медаль къыфагъэшъошагъэх.

— Шъхьэлэхъо Ахьмэд Псыбэ къоджэ советым итхьаматэу Iоф ышIэщтыгъ. Ар япащэу 1952-рэ илъэсым илъэсий еджапIэр Псыбэ щагъэпсыгъ, Ныджэ­псыкъо плодопитомник совхозым ипэщагъ ыкIи ар совхоз-миллионерхэм ясатырэ хигъэуцон ылъэкIыгъ, — къыщаIотагъ район администрацием ипресс-къулыкъу. — Ащ ишIуагъэкIэ къуаджэу Псыбэ электроэнергиер ращэлIагъ, гъогур, культурэм и Унэ, кIэлэцIыкIу IыгъыпIэ ыкIи амбулаторие щашIыгъэх. Пенсием кIоным ыпэкIэ ащ Псыбэ щыраригъэ­жьэгъагъ къатитIоу зэтет еджапIэм ишIын.

Ныбэ Анзор.