Апэ итым IукIэщт

«Эльбрус» Щэрджэскъал — «Динамо-МГТУ» Мыекъуапэ — 92:84.

«Эльбрус» — «Динамо-МГТУ» — 65:70.

ШэкIогъум и 11 — 12-м ешIэгъухэр Щэрджэскъалэ щыкIуагъэх.

ТекIоныгъэр зыхьыщтыр язэрэмыгъашIэу зэдешIагъэх. Апэрэ зэIукIэгъур «Динамо-МГТУ-м» дэгъоу ыублагъ, хъагъэм Iэгуаор ридзэзэ, бысымхэм апэ ишъыгъ. «Эльбрус» кIэухым нахь щылъэшыгъ. ЯтIонэрэ ешIэгъум Адыгеим икомандэ нахь пхъашэу ухъумэн Iофыгъохэр ыгъэцэкIагъэх, ифэшъуашэу текIоныгъэр къыдихыгъ.

ТиешIакIоу Усольцевым Ставрополь шъобж къыщытыращагъ, зичэзыу зэIукIэгъухэм ахэлэжьэн ылъэкIыщтэп. «Динамо-МГТУ-м» итренер шъхьаIэу Андрей Синельниковым къызэрэтиIуагъэу, шэкIогъум и 21 — 22-м ешIэгъу къинхэр тикомандэ иIэщтых. Зэнэкъокъум апэрэ чIыпIэр щызыIыгъэу «Буревестник», Ярослав хэку, тIогъогогъо IукIэщт. СпортымкIэ дунэе класс зиIэ мастерэу, Мыекъуапэ щапIугъэу Илья Александровыр «Буревестникым» щешIэ.

ЗэIукIэгъухэр спорт Унэшхоу «Ошъутенэм» щыкIощтых, пчыхьэм сыхьатыр 6-м аублэщтых.

ЕМТIЫЛЪ Нурбый