«Апэрэу черкесылI сэлъэгъу»

Анахь згъэлъэпIэрэ цIыфхэу тиреспубликэ исхэм ащыщэу Пэнэшъу Руслъан Хьатыгъу ыкъом идунай ыхъожьыгъ. Тхьэм джэнэт къыритынэу сыфэлъаIо. Игупсэхэм зэкIэми сыгу къеоу сафэтхьаусыхэ.

Руслъан фэгъэхьыгъэу зы хъугъэ-шIагъэ сыгу къэкIыжьы. Германием тыщыпсэузэ ар къалэу Маннхайм дэт музеим едгъэблэгъагъ, ащ ежьым «адыгэлI» щаригъэIогъагъ. ЗэIукIэгъур зэхащэнымкIэ Иран щыщэу алырэгъухэр языгъэшIырэ лIы горэ IэпыIэгъу къафэхъугъагъ. Къэгъэлъэгъонышхохэр зызэхащэхэм, спонсорым цIыфхэр елъэIухэу рагъэжьагъ «Алырэгъу тиIэпышъ, къытфэпщэфыгъэмэ тигуапэ хъущтыгъ» аIозэ.

Пэнэшъу Руслъан ялъэIущтыр хэгъэкIи, зэзакъо ыжэ къызэтырихыгъэп. Ар зелъэгъум, IэпыIэгъу къафэхъугъэ лIыр музеим ипащэ еупчIыгъ:

— Мо лIыр зэзакъуи зыми къыкIэлъэIугъэп, адрэхэр мафэ къэс къытэлъэIух. Хэт щыща ар?

— Ар лъэIощтэп, черкес ар, — къыриIожьыгъ музеим ипащэ.

— Черкес, ара? ЧеркесыцIэр бэрэ зэхэсхыгъэ, ау апэрэу черкес сэлъэгъу, — ыIуагъ ыгъэшIагъозэ спонсорым.

ЕДЫДЖ Батырай.