Андырхъое Хъусенэ исаугъэт Москва щагъэуцугъ

Советскэ Союзым и ЛIыхъужъэу, журналистэу, усакIоу Андырхъое Хъусен Борэжъ ыкъом исаугъэт тыгъуасэ Москва къыщызэIуахыгъ.

Урысыем итхакIохэм я Союз зычIэт унэм ар щагъэуцугъ. Андырхъое Хъусен исаугъэт гъэпсыгъэным кIэщакIо фэхъу­гъэхэр Урысыем итхакIохэм я Союзрэ адыгэ общественнэ организациехэмрэ ары. Республикэм ихэбзэ къулыкъухэ­ми ахэм къадырагъэштагъ. Саугъэтыр зышIыгъэр сурэтышI, скульптор цIэрыIоу Зураб Церетели.

Адыгэ советскэ журналистэу, усакIоу, Советскэ Союзым и ЛIыхъужъэу Андырхъое Хъусен Борэжъ ыкъор 1920-рэ илъэсым гъэтхапэм и 2-м къуаджэу Хьакурынэхьаблэ къыщыхъугъ. Къыблэ фронтым идзэ ия 18-рэ шхончэо дивизие ия 136-рэ шхончэо полк ия 733-рэ ротэ ар имладшэ политрукыгъ. 1941-рэ илъэсым шэкIогъум и 8-м Антрацитовскэ районымкIэ къуаджэу Дьяковэ дэжь зэо пхъашэхэр щыкIуагъэх. Я 733-рэ шхончэо ротэм пыир къызэтыриIэжэнэу пшъэрылъ къыфашIыгъагъ. Ротэм икомандир зэфэх нэуж младшэ политрукэу Андырхъое Хъусенэ зэкIэми апэ итэу пыим жэхахьэу фежьагъ. Зыкъитынэу нэмыцхэр ащ къекуохэ зэхъум, «Урысхэм затырэп!» ыIуи, гранатэхэр ахидзагъэх. Пыйхэр зыдыригъэхьхэзэ, ежь ыпси щитыгъ.

СССР-м и Апшъэрэ Совет и Президиум 1942-рэ илъэсым гъэтхапэм и 27-м ышIыгъэ УказымкIэ младшэ политрукэу Андырхъое Хъусен Борэжъ ыкъом Советскэ Союзым и ЛIыхъужъыцIэ къыфагъэшъошагъ. Луганскэ хэкумкIэ селоу Дьяковэ икъош къэхалъэ ар щагъэтIылъыгъ.

Андырхъое Хъусенэ лIыхъужъныгъэу зэрихьагъэр республикэм исхэм ащыгъупшэрэп. Илъэс 35-рэ фэдизкIэ узэкIэIэбэжьмэ, къуаджэу Хьакуры­нэхьаблэ щагъэпсыгъэ музеим гъэрекIо гъэцэкIэжьын IофшIэнхэр рашIылIагъэх, Андырхъое Хъусенэ лIыхъужъныгъэу зэрихьагъэр къызыщыгъэлъэгъогъэ диорамэр агъэкIэжьыгъ. Адыгеим и ЛIышъхьэ пшъэрылъ зэрафишIыгъэм тетэу гъэцэкIэжьын Iофхэм апэIухьэгъэ мылъкур къыхагъэкIыгъ.