Анахьыбэу цыхьэ фашIы

Адыгеим щыкIогъэ Дунэе инвестиционнэ форумэу «INVEST IN ADIGEYA» зыфиIорэм хэлэжьагъэхэм ащыщ ПАО-у Сбербанкым и Къыблэ-КъохьэпIэ банки. Зыми емыпхыгъэу проектхэр экспертизэ зэришIыщтхэр ары ащ къыщигъэлъэгъуагъэр.

Къыблэ-КъохьэпIэ банкым ипащэу Евгений Титовым къызэриIуагъэмкIэ, проектым уасэ фэшIыгъэным пае Сбербанкым къеуалIэрэм предприятие 25-мэ яанализ лъапсэ зыфэхъугъэу зыми емыпхыгъэ экспертизэ ыгъотыщт.

Адыгэ Республикэм иэкономикэ иинвестор шъхьаIэу зэрэщытыри Евгений Титовым къыхигъэщыгъ. Ащ къызэриIуагъэмкIэ, пстэумкIи чIыфэу ытыгъэр сомэ миллиарди 3,4-рэ мэхъу. Сбербанкым ишIуагъэкIэ проектышхохэр, анахьэу псэолъэшIыным ыкIи мэкъумэщ хъызмэтым алъэныкъокIэ, щыIэныгъэм щыпхырыщыгъэ хъугъэх.

ЦIыфэу республикэм щыпсэухэрэм яфэIо-фашIэхэм ягъэцэкIэнкIи Сбербанкым пэрытныгъэр ыIыгъ. Республикэм щыпсэоу банкхэм чIыфэ къаIызыхыгъэхэм япроцент 43-мэ зызфагъэзагъэр Сбербанкыр ары. Ащ имызакъоу, Адыгеим исым ипроцент 66-м ямылъку ратынэу цыхьэ фашIыгъ мы банкым.

 Сбербанкым ишIушIагъэкIэ инвестиционнэ проектышхохэу мини 10-м ехъу Урысыем щыпхырыщыгъэ мэхъу. Экономикэм иотраслэ зэфэшъхьафхэм мылъку ахэлъхьэгъэнымкIэ опытышхо ащ иI.